Идеологија на политичко уверување или демагогија за остварување лични интереси? Дали партијата е единствената опција за напредок и успех?
На Балканот „популарноста“ на партиската книшка не излегува од мода. За разлика од земјите во регионот каде во партија се зачленува и до 15 отсто од населението, европскиот просек е 3,5% од вкупното население во земјите.
Пред неполн месец владејачкиот Социјалдемократски сојуз на Македонија ја започнаа постапката за ажурирање и активна регистрација на членството. На терен тоа значи дека 1 563 тима од 74 општински организации ги посетуваат домовите на партиските членови.
Очекувањата на раководството на СДСМ се дека по ажурирањето ќе имаат околу 60 000 члена. Тоа значи дека близу 3% од населението е член на владејачката партија. Но, релативно високиот број членови на СДСМ не е изолиран феномен.
Според податоците што ги добивме од Централиот регистар, во Северна Македонија постојат 65 политички партии. Издвоивме 15 кои на минатите локални и парламентарни избори оствариле некаков резултат и ги прашавме – колку членови имаат.
Според висок партиски функционер на ВМРО-ДПМНЕ, тие имаат околу 100 000 члена. ДУИ, пак, брифира дека имаат 75 000 члена. Демократски сојуз вели дека имаат издадено 34 000 партиски книшки, а Алијанса за Албанците 20 000. Ако се соберат бројките од 12 партии што ни одговорија, само тие имаат 351 500 членови.
Доколу се користи проценката на „книгата на факти на ЦИА“, дека Северна Македонија брои население од 2,13 милиони, тоа значи дека 16,5% од населението, или секој шести, е член на политичка партија.
Реалноста е уште пострашна кога ќе се направи споредба колку граѓани на развиените земји имаат партиска книшка.
Така, ако во СДСМ членува околу 3% од популацијата во земјава, а во ВМРО-ДПМНЕ околу 4,7%, во Велика Британија, на пример, владејачката Конзервативна партија на Борис Џонсон има 191 000 членови во земја од 66 милиони жители, или со партиска книшка на власта се само 0,29% од луѓето.
Во Германија, владејачката ЦДУ на канцеларката Ангела Меркел има 407 илјади членови што е 0,5% од германското население. Партијата на францускиот претседател, Емануел Макрон, има близу 420 000 членови или околу 0,63% од популацијата. Сепак, како се оди на југ, работите се менуваат. Владејачкиот ХДЗ во Хрватска има 220 000 членови во држава од четири милиони жители, што е 5,5% од населението. Апсолутен лидер во регионот е СНС на српскиот претседател Александар Вучиќ. Партијата има 750 000 членови на близу седум милиони жители, што е 10,71% од населението.
