Ideologia tatro politikano aspekto jali demagogia te šaj resel pple personalno interesoa? Si li i partija jekhutni opcia te kerel pe progresi em sukcesi*
Ko Balkano o “popularno” partisko legitimacie na ikljona tari moda, Diferencijaja taro thema ko regioni kote ki partija sar olakere membrora khuven em dži ko 15% taro sa o dizutne, e eruopakoro proseko si paše 3,5% taro dizutne ko thema.
Angleder jekh masek i legarutni Socialdemokratikani unia tari Makedonia - SDSM počmingja i procedurako ažuririba em aktivno registracia taro pire membrora. Odova sikavel kaj ko tereni 1 563 timia taro 74 komunakere organizacie ka džan ko khera ple partisko membrenge.
O SDSM udžarela kaj ažuriribaja ka ovel olen paše 60.000 membrora . Odova si paše 3% taro dizutne kio them si membrora ko SDSM. Ama akava relativno učo numero sar membrora ko SDSM nane “izolirimi” praktika ki them. Premal o informacie taro Centralno registri ki Utarali Makedonia isi 65 politikane partie. Hulavde si 15 so ko nakhle lokalno em parlamentarno alusariba sikavgje desavo rezultati em pučle si kobor membrora isi olen.
Premal učo partisko funkcioneri ko VMRO - DPMNE olende isi paše 100.000 membrora, o DUI brifirinela kaj si len paše 75.000 membrora. O Demokratsko Unia vakeren kaj dži akana dengje 34.000 partisko legitimacie, i Aliaujnsa e Albancongiri 20.000. Te khedingje pe o sume taro 12 partie so dengje piro džovapi salde olende isi len 351 500 membria.
Te dikhlja pe em i percepcia sar “lil taro faktia tari CIA” kaj ki Utarali Makedonia si la paše 2,13 milioni dizutne, odova sikavela kaj 16,5% taro dizutne jali sako šovto si membro ki desavi politikani partia.
O realiteto si panda majdaravutne kana ka kerel pe jekh paralela kobor dizutne isi ko europakere ekonomsko zorale thema isi len partisko legitimiacia.
Agjaar ako ko SDSM si la paše 3% tari sasti populacia ki them, a ko VMRO - DPMNE paše 4,7%, ki Britania sar egzamplo i legarutni Konzervativno partia taro Boris Džonson si la 191 000 membria ki them taro 66 milionia dizutne , jali partisko legitimiacia si len salde 0,29% taro manuša.
Ki germania i legautni CDU tari kancelarka Angela Merker si la 407.000 membria so si 0,5% tari sasti germansko populacia ki them. I partia taro franciakoro presidento o Emanuel makron si la paše 420 000 membria jali paše 0,63% tari populacia ki Francia.
Numa sar džal pe majtele premal o Balkani o bukja iranen ki aver konotacia.
O HDZ ki Kroacia si la 220 000 membria ki them so gejnel 4 milionia populacia si si ko procentoa 5,5% Sar apsolutno lidero ko regioni si o SNS taro srbiakoro presidento Aleksandar Vučić. E partia si la 750 000 memdbria ki Srbia so gejnel paše 7 milionia dizutne , so si premal procento 10,71% taro dizutne.
