Pativalen Rajonalen
Ko agorutno periodi ikljona but hovavne thaj bange informacie ko mediumi thaj o socialno netvorko, resarinaja te kerel pe manipulacia thaj te anel pe ko hulavipa sar maškar Romani agjaar thaj an i internacionalno nivelo e institucien kamav te dav informacia akaleske:
• An o 18 marto 2016 berš an o Skopje, R.Makedonia , 70 delegatora - membrora taro paše 40 thema tari sasti lumia an o 10-to ORU Kongreso alusarde nevo IRU legaripa - Prezidiumi sar jekhto prezidento e Zoran Dimov , kote i misia taro akava legaripa si te buvljarel pe i demokratsko platforma thaj aktiviteti an o IRU an o avutno periodo , thaj odova si i Demokratsko Tranzicia, thaj sa o aktivistia an o akava Kongresi thaj e indiakoro Govermento teloikergje akava plano, kotar so iklili thaj i idea i Romani Nacia te ovel an i sasti lumia, sar indiakiri Romani diasporea. Dji o aver alusariba jekhutne thaj legitimno prezidenti an o IRU ka ovel o Zoran Dimov.
Ko ande decizie thaj kerde prevencie rigatar taro IRU Kriso so ka kerel aktia mujal savore okolen so anen konfuzia e situaciake an o IRU thaj čhinavipa taro teleparavina, bičhavas apelo:
• Majurgentno te čhinaven pe o sa oficialno konekcie, mitingia thaj finansiriba proektia so si konektirime an o anav tari Internacionalno Romani Unia - IRU thaj agjaar korkoro proklamirime prezidentia- lideria sar so si o rajo Nortmund Rudović thaj oleskiri IRU-Latvia, thaj o rajo Dorin Čoaba tari a.a. IRU-Sibiu, Romania. An o olengere "agende" trujal proektia taro plesutno - lično intereso, nane aver proektia. Ola keren korkoro individualno promocia sar "legitimno prezidentia an o IRU, thaj ko anav e organizaciake keren proektia sar so si " romane pasportia" thaj avera (e Nortmundeskoro proekti thaj oleskiri paše ekipa), thaj o Dorin Čoaba tari Romania thaj olčeskiri paše ekipa so si targeti bašo kerdo kriminalo an i olengiri matično them Romania. Ov trujal sa palem deklaririnel pe kaj si Thagar e Romenge an i Romania, akna kerel zori te promovirinel pe sar Thagar sa e Romenge an i lumi. so bibahtake nane odokhare asajbaske, numa si tragično thaj majteluno akti e Romenge tari sasti lumia.
Trubul te džanel pe kaj o IRU nane personalno, individualno organizacia, o IRU nane nikaskoro thagaripa, jali privat biznis thaj firma. O IRU si Internacionalno organizacia sa e Romenge an i lumia.
But si bibahtalo o fakti kote desave romane aktivistia so kamen te keren promocia sar romane lideria , thaj sar "majvalidno", "majbari" thaj aver epitetia, thaj kamen te involvirinen pe an i politika an o IRU.
Odova akti sivalea o egzamplo taro rajo Jovan Damjanović , so si prezidento an o Lumiakoro Kongresi e Romengoro (o paradokso si panda majbaro so o epiteti "Lumiakoro" si registririme an i pli matično them Srbia - Beograd!) , diferenciaja taro IRU registracia so si an i centrala an i Viena ki Austria!. O rajo Damjanović arakhel te hulavel "lekcie" thaj te anel "propozalo" ko si validno IRU. a trujal sa ov korkoro džanela kobor si "respektirime" an i oleskiri them - Srbia, soske kana rodingja mitingo e prezidentoja tari odoja them o Tomislav Nikolić ko dikhiba sar delegacia taro Lumiakoro Romano Kongreso, thaj kana reslja an o kabineto e prezidenteske, resle salde duj džene "sar delegacia", kote o prezidento Nikolič pučlja " Savi si akaja delegacia romani? Tumen duj džene sien akaja delegacia?" kote palo odova asandilo em na kergja o mitingo olencar.
Akava akti sikavel kobor si ove respektirime thaj validno . Trujal sa te da jekh phravdo pučiba dži ki "mesia" Jovan Damjanović, Kote thaj sar si hardžime milionia eura so sine dende taro desave fondia , te šaj kerel "Harialo bizniso" an i Srbia?. Ko jekh ko persiberšeskere bare panja an i diz Obrenovac, ko anav e Romenge sine dende leske bare love sar arka e Romenge ko akava regino? So resle o Roma taro Obrenovac?.
Džanel pe bašo čoriba taro bare finansisko dimenzie ko agjaar anavkerde individualno romane aktivistia, thaj rigatar desave so nane ni Roma, thaj isi čoriba odole lovenge odolea so keren malverzacia an o anav taro IRU thaj upral o dumo taro Roma. Akava si phari forma hovavin thaj si sa aktia te vazdel pe rodaripa taro kriso sebepi so teleperavel pe o anav e romane naciake.
Odoleske o IRU ka lel majurgentno akcie ko sig vrama. Pakjava majčačutne thaj Tumen da te den žutipe thaj teloikerin akale aktiviteteske.
Respektirime,
Sa odola agjaar notirime " romane organizacie" so meljarena o anava taro IRU sikavibaja ki Tumende sar oficialno thaj legitimno membria thaj ko aver da organizacie thaj fondacie , donatoria thaj aver institucie, mangipaja te len love (EU fondia so si bašo romano pučiba, problemia. love so si teleperavde milionia eura ko anav taro Roma thaj Holokausto thaj aver), dejbaja lafi kaj ka keren transparentno buti a palo odova te phanen o udara sa ko vakti kana hardžinen o love.
Te šaj ova transparentno thaj phravde , o Kongresi taro IRU an o Skopje majphravde bičhavgja akharina dži ko sa o upreder anglutne anavkerde persone te aven thaj te len than ano diskusie vash o Demokratsko Tranzicia , ola daravinaja taro demokrtasko aktiviteto an o IRU Kongreso ko Skopje, kergje starto taro deiba hovavne informacie thaj atako upral akava Kongreso, sikavibaja atmosfera taro hovavno patriotizmo thaj hulavipa an o IRU, dejbaja informacie kote kamen te garaven pe palal ple parazitsko ambicie leibaja e Romen sar piro paravani.
Čačutne pakjava kote akava lil ka čhivel agor bašo sa o kerde špekulacie trujal o anav , legitimiteto thaj avutno aktiviteto taro IRU an o intereso tari romano nacionaliteti thaj an o intereso phravde thaj transparetno konekcia e europakere, thaj lumiakere instituciencar.
Respektea
Membro an o Internacionalno Romani Unia - IRU Kris
Tomo Mladenov
London - 14 aprilo 2016 berš
