Anleder nekobor berša i Italia lelja propozalo i Nacionalno strategia e Romenge notiribaja nevo dokumento baši Nacionalno strategia e Romenge notiribaja kaj akava nevo dokumenti garantirinela protektiva, medicinsko tretmano, edukacia thaj thanjaripa tiknjaripa e čorolipaske thaj marginalizacia.
Numa ko than odoleske, bare love dende tari rig e EU si hardžime baši deportacia kote ko odova čhani dendo si motivo bašo anti romano hošipa, rasizmo thaj baro numero atakia daravutne motivencar. Odova sikavel thaj o agorutne aktia palo notiriba e 8-to Parileske Internacionalno dive e Romenge kana an o Brisel thaj sasti Europa kerel pe sine . Akava drom targeti sine o romane familie taro Tore del Greko ko pašipa taro Napoli. I reakcia taro lokalno profesoria sine ko anav e čhavenge so džana ko škole ko odova regioni.
Akaja situacia kerel thaj o IRU sar organizacia so definiringja pe an o agorutno 10-to IRU Kongresi an o Skopje, te lel i obligacia te šaj nakhavel pe akava problemi. Amen rodaja tari EU te istemalkerel plo kapaciteti thaj autoriteti te čhinavel pe i deportacia upral o Roma kote klar deklaririnen pe te granatirinen respekto e manušikane hakoenge.
I Francia angleder nekobor berša an i akcia deportiringje upreder 20.000 Roma. I Bari Britania ko momenti implementirinela asavke akcie taro nalegalno deportacie ko bare formatia.
Šungjem taro EP sar akharela te čhivel pe agor akale aktivitetenge ko olengere diskusie an o Europakoro Parlamento. Akana taro lafia trubul te keren pe aktia ki forma tari jursdikciakiri intervencia. E EU si le zoralipa jurisdikciakere instrumentencar te kerel kriseskere mujal aktia i Italia so phagel o fundavno manušikane hakoa thaj i diskriminacia.
I deportacia so sine an o Milano, Napoli thaj Rim kote so mukhel e korkoro familien te oven mukhle korkoro te arakhen alternative. Akala aktia sine vakerde thaj ko IRU Kongresi an o Skopje thaj akana trubul te ovel amari kolektivno obligacia te keras maripa mujal akava tretmano te akhara ko čhinavipa sako forma tari deportacia sa dži kote na arakhel pe desavi alternatiuvno forma taro thanjaripa akale familienge.
Zoran Dimov
Prezidenti an i Internacionalno Romani Unia - IRU
