Предлог составот на новата влада е комплетиран и заедно со програмата треба да биде доставен во Собранието, додека гласањето се очекува да се случи претстојниот викенд.
Од „Твоја Македонија“ во владата ќе има 15 членови, од кои три на вицепремиерски места, кадри од коалицијата „Вреди“ ќе раководат со пет министерства и ќе имаат едно вицепремиерско место, а два министерски ресора ќе предводи партијата ЗНАМ – За наша Македонија. Вицепремиерски места ќе имаат и коалициските партнери Социјалистичката партија и Демократската партија на Србите.
Шабан Салиу ќе биде министер без ресор задолжен за интеграција и имплементација на декадата на Ромите.
Мицкоски рече дека при изборот на кадровскиот потенцијал и решенија за состав на новата влада се водел од принципите за чесност и посветеност, како што нагласи – да бидат луѓе кои ќе дадат голема енергија во процесите и целосно ќе се вложат за реализација на амбициозните зацртани цели.
Очекувам успешна реализација односно гласањето да заврши во текот на следниот викенд 22-23 јуни, изјави Мицкоски.
