Француската влада во парламентот поднесе закон што им овозможува на оние што се вакцинирани да имаат пристап до јавен превоз, ресторани, културни институции и други јавни места. Премиерот Жан Кастекс уште во понеделникот го доставил законот за воспоставување долгорочен систем за управување со вонредни состојби во собраниска процедура, кој е уште познат и како „зелен вакцина – пасош“, бидејќи содржи одредби што условуваат пристап до одредени активности и места врз основа на вакцинација.
Според тој закон, премиерот има право да одобри движење на лица, нивен пристап до јавниот сообраќај или одредени места врз основа на тест со кој се утврдува дека некое лице не е заразено или по превентивен третман, што вклучува и вакцинација против коронавирусот, објави Танјуг повикувајќи се на агенцијата Анадолија. Дебатата за законот почна минатата недела кога членовите на либералните и центристичките партии предложија воведување таканаречен „зелен пасош“ за луѓето што се вакцинирани. Законот е одговор на неколку истражувања кои покажаа дека Французите се многу скептични во однос на вакцинацијата и оти само околу 40 проценти од граѓаните се подготвени да се вакцинираат.