Илјадници работници со нетрпение чекаат да дојде 1 март. Од 1 март во Германија стапуваат на сила новите правила за доселување на квалификувана работна сила.
Добрата вест во новиот закон е укинувањето на критериумот според кој една компанија мора прво да се обиде да најде лице во Германија или во Европската унија, а дури потоа да вработи кандидат надвор од ЕУ.
Голема новина е тоа што кандидатите со квалификувано стручно образование доколку имаат соодветно познавање на германскиот јазик и доколку имаат гаранција за издржување, ќе можат да дојдат во Германија на шест месеци за да бараат работа.
Моментално во Германија има околу 1.4 милиони слободни работни места. Најдефицитарни кадри се здравствените работници, лекарите, физиотерапевтите, медицинските сестри, ИТ професионалците, инженерите и занаетчиите во градежната индустрија, а потоа следат експертите за авијација, мехатроника, електротехника, енергетска технологија и многу други.
За лицата постари од 45 години треба да се достави и договор за работа со одредена минимална заработка или доказ за гарантирани финансиски средства за издржување.
Лицата на возраст до 25 години со завршено средно образование ќе можат да престојуваат во Германија максимум шест месеци за да можат да конкурираат за место за натамошно стручно усовршување.
