O numero e Romengoro so mule an o Holokausto legarel taro 220.000 dži ko jekh milioni, numa saste našti te vakerel soske isi tikni arhiva, thaj dokumentia sar informacie

Dži kote o fakti kaj o Roma na sine tretirime sar manuša, si jekh taro karane o napendžardo numero so si viktimia an o Holokausto, si notirime ki debata thaj panel diskusia so legargja pe telal o anav "O Roma thaj o Holokausto ko Dujto lumiakoro maripa", kote than lele o žurnalisto Ramuš Muarem, thaj o profesori  bašoi romani čhib thaj kultura an o Univerziteti an o Zagreb o Ljatif Demir.

O žurnalisto Muarem Ramuš notirinel kaj i identifikacia e Romenge so sine legarde ko konc logoria thaj so si kerdo genocid ko vakti taro Dujto lumiakoro maripa si but tikne, thaj na jekh tretirime sar manuša, sebepi o keriba upral lende eksperimentora, thaj odoleske nadžanel pe kobor si o sasto numero Roma so si viktimia taro Holokausto.

O profesori Ljatif Demir notirinel sine kaj o Roma ko vakti taro o dujto lumiakoro maripa nakhavgje jekh taro duj rote bila~he momentia ko fašizmo vaš i sasti eliminacia e Romenge.

O duj diskutantia akcentiringje kaj i eliminacia e Romenge startujnel panda taro 1933 berš kana o nacistia kergje plani bašo totalno eliminacia e Romenge.

O Ljatif Demir ko jekh notiringja kaj  but hari kerel pe lafi kaj o Roma sine viktimia taro fašizmo ko akava maripa.

Maškar o aver o žurnalisto Muarem Ramuš noitirinel kaj ko vakti kana sine kriseskoro proceso mujal o nacistia, sar faktia na liparen sine e Romen kaj sine viktimia, numaj aver nacie. Isi pherdo lila hramosarde baš o Holokausto numaj but hari dende faktia kobor Roma sine viktimia ko odova vakti