Pali i havljarin bašo ikeripa o 10-to IRU Kongreso an o Skopje so ka ikerel pe taro 18 dži ko 20 mart 2016 berš plo than ka lel thaj o delegato taro IRU tari India o rajo Veeranda Riši.
Ko piro e mailo ov sikavel baro čalipa tari akahrin taro organizatori o Zoran Dimov thaj vakerel kaj akava Kongreso an o Skopje si bari šansa ki nevi rig e romane historiake ko moderno vakti taro dživdipa.
Ko integralno teksto taro e mailo taro Riši tergjol:
" Dragone phrala Zoran Dimov, naiskerav baši tumari akharin ko 10-to Kongreso so ka ovel an o Skopje taro 18 marto thaj ka avav majbare lošalipaja.
Me udžarav but so ka šaj te dikhav man e rajoja Faik Abdi kote mire mule dadesa o rajo V.R.Riši zapendžargje pe ko vakti taro Jekhto Romano Kongreso an o Londono 1971 berš . Vakti kana sine baro idealizmo thaj udžardo o Romano flago, so kergja te ovel ideasa taro miro dat kote sine čhivdo i loli čakra Ašok so sine lendi taro Indiakoro flago.
Palo odova sigate mo dat alo an i Šuto Orizari thaj sine čalo kobor o manuša ikergje piri tradicia kaj si aven tari India i čhib thaj i kultura. Kana stratujngja o Romano - Pandjap alavari so islutririnel kote 60% taro vokabulari si taro Pandjab.
O čačipa odole vizitake avilo kana an o jekh biav mo dat uklilo an o jekh balkoni taro khera an i Šutka thaj anglal sa o Roma vakergja: "Amaro rat thaj tumaro rat jekh si"! Miri mangin an o iraniba an i Šutka te džav palo drumo so gelo mo dat. Me ka ovav an o šajdipa te vakerav e Romenge tari Šutka lačhe informacie kaj e Indiakoro Govermento prekal i konferencia an o Delhi 12/13 fevruari , ka kerel proceso kote pakjav kaj ka anen dekreto kaj o Roma si majbari thaj majpurani nacionalno jekhin so si akana an i sasti lumia thaj o Roma si Indiakiri diaspora! Tumende isi tumen tumari them a odova si India!
Kaj i India ka kerel baro interes tumenge kote prekal i Diplomatia so organiziringja duj Romane festivalia an i India, o jekhto Festivali kote i muli premierka Indira Gandi udžargja e romane umetnikon , muzičaria thaj intelektualcia sar "Indiakere čhave". Ko jekh kergja pe i partin ROMA kote sako dive džala sine ko sa Indiakere diplomatsko misie, konektiripaja thaj o UN ko Njujor thaj Ženeva. Mange sar so snie thaj o ambasadori Menon, ko 70-to berša o avipa an i Šutka ka ovel mange sar te irangjum man khere. Saste ilea kerav thaj naiskerav thaj bahtarav i organizacia taro akava Kongreso thaj te ova savore ko jekh than.
Devlikane mangav tumenge but baht!
Veeranda Riši
