Во рамките на Скопско лето, вечерва во Куршумли Ан во Скопје, во соработка со ПолиФониа, се одржува концерт на џез фестивалот „Нишвил“ од Србија. Ќе настапат „Моба трио“, Нишвил „Ромајам“ оркестар и ди-џеј Лоптица.
Според амбасадорката на Србија во земјава, Невена Јовановиќ, преку настапот на овој „Нишвил“ џез фестивалот во Скопје, уште еднаш се потврдува добрата билатерална соработка која постои меѓу двете земји.
Таа нагласи дека Србија целосно е посветена да глади пријателска соработка со Македонија и се надева дека во иднина таа ќе се интензивира.
На програмата ќе биде композицијата на Шабан Бајрамовиќ, со оглед на тоа што покрај класичен, публиката ќе има можност да слушне и етно џез музика.
Пијанистот на групата „Моба трио“ Миша Павловиќ посочи дека ова го прават најмногу од љубовта кон класичен џез, свират композиции од минатата година, а во тек е и снимање на нивниот албум.
Вокалната солистка на Нишвил „Ромајам“ оркестарот, Злата Маринковиќ посочи оти ѝ е драго што е дел од овој проект и што има можност да ја доловат ромската но и етно џез музиката.
