An o 10 fevruari 2019 berš an o 71 berš dživdipa mulo o pendžarutno poeti, pisateli thaj pendžardi persona an i India o Dev Bhardvaj. Akalea i romani nacia našavgja jekh baro intelektualco thaj romano aktivisti.

I Dev Ray Bhardvaj si biame an o 20.11.1948 berš an o Gurdaspur- Punjab , India. Fundavutni edukacia agorkergja ko piro gav Marar a uči edukacia an o Čandigar, kote thanjargjape an o 1966 berš. Ov hramosargja pobuter lila naracijaja, drame thaj lila čhavenge, thaj translacia ko nesave lumiakere pendžarde klasiicia an o Punjab.

O Dev Bardvaj sine membro an o literatia e lumiakere nacienge an o Kazahstan thaj regionalno šerutno represento an i Unia literatenge tari lumiakiri nacia (Kazahstan) e themnege Punjab thaj Hariana an i India.

Ko jekh sine počesno membro an i Sahtia Akademia an o Čandigar thaj reslja Themakoro phursako bašo pherdo aktiviteto an i literatura an o 2012 berš.

I Asociacia taro bibukjakere intelektualcia - INI tari Vinica počmingja te kerel rodaripa baši edukaciakiri inkluzia e čhavenge Roma taro komune Vinica thaj Kočani, thaj o forme tari bukjakiri eksploatacia , diskriminacia thaj aver forma taro terori upral olende.

Partenri an i realisacia e proekteske si o Romano NGO "Avena" taro Kočani , a o rodaripa thaj i analiza ka implementirinel pe ko pobuter target grupe dizutne an o thavdipa akale kalendarsko beršeske.

Kama te resa ki čačutni percepcia taro numero romane familie kaskere čhave na džana an i škola thaj si viktimia an i bukjakiri eksploatacia thaj terori. Ka kera buti an i majlačho informiriba ko olengere niamia thaj te keren majzoralo io kapaciteto ko relevantno institucie te čhinaven e lhavengiri bukjakiri eksploatacia thaj diskriminacia e čhavenge sebepi olengoro etnikano , religiozno thaj aver preperutnipa.

Akale familienge ka da suportho te akceptirina olen anglal o lokalno institucie konkretno propozaloncar te anen majlačhe programe ki protektiva ko niamia e čhavenge, vakergja o Todor Conev, presidento an i Asociacia INI.

Ko aktivitetoa akale proektoske ka oven organizirime edukativno praktike e jeriencar thaj ka kerel pe brošura an i protektiva e niamenge taro čhave taro bukjakoro eksploatacia, diskriminacia thaj terori.
 
Akaja analiza si finasirimi lovencar taro EU an o pervazia e proektoske " Strateško partenrstvo ko buvljaripa e socialno agendake ko trampe" so implementirinel la i Asociacia baši akcia mujal terori thaj kinobikiniba e manušencar "Putardo Udar"