Veles: O nevebiande čhave sasljarena pe thaj rodel pe nevo kher e familiake Zekirovi
O duj nevebiande bliznakia taro Sevgjuli thaj i Frosina Zekirovi taro Veles taro dive ko dive si sa majlačheste, ahana , resen an i gramaža , numa palem ka ačhon an o hospitali sa dži kote o institucie jali humano dizutne na arakhen lenge kher so ka ovel ole lačhe šartia te šaj akaja familia te dživdinel.
I tifozeskiri grupa "Gemidžii" sine len čhivdi kutia bašo donacie kote ko utakmice taro o klubi "Borec" ka ćhiven o love an o konto taro Sevgjuli te šaj te ovel majlačhe šarti dživdipaske oleskere trin čhavenge.
I Valentina Golova si patronažno medicinsko personali so opservirinel e familia Zekirovi . Oj iniciringja thaj insistiringja o bebia te oven hospitalizirime.
I Golova vakerel kaj but droma dikhena pe sine e familijaja Zekirovi.
O patronažno ofiso an o Veles so opservirinela i diz Veles thaj o trujale mahale.
O medicinakoro personali dikhen e bebija , o humano dizutne e Sevgjuleske thaj e Frosinake dikhen i diz tearakhen lenge lačho kher . Si len nesave khera kote šaj te dživdinen ola.
I direktora taro socialno centro an o Veles na del sine antvorto ko olakoro telefono . Akanaske nane info o socialno bukjarno so opservirinel e familia Zekirovi thaj o centro te arakhen faisli olengere akomodaciake. O centro kergja te arakhen i dokumentacia bašo Sevgjuli thaj i Frosina te šaj resen lenge love pe konto.
Sa dži kote na arakhel pe faisali , o dat thaj oleskoro duj beršengoro murš ačhona ko phago kher , bizi elektrika udžaribaja e Frosina thaj e bliznakon te ikljon taro hospitalo.
