Palo havljarde resultatia taro Konkursi e Beršeskere programake 2019 berš taro Ministeriumi kulturake , bašo akceptirime love baši realisacia e proektenge dela pe o pučiba - Kobor o Romane kulturakere aktivistia apliciringje thaj kobor olendar si akceptirime?

Te šaj te kerel pe an o vakti reakcia dži ki akaja institucia trubul kompletno informacie bašo o numero aplikacie , kobor love rodingje thaj avere rigatar info bašo askceptirime taro sa numero dende aplikacie taro Roma.

Akaja inicijativa kerel o Presidento taro RDICM Zoran Dimov, so si membro an i bukjarni grupa so kerena o Naciionalno akcisko plani an i progreso e kulturake ko Roma , aso i strategia e Romenge 2014-2020 berš. Akaja bukjarni grupa formirimi si panda an o Noemvri 2018 berš palo dekreto e Govermenteske tari RM thaj o teganutno ministeri bizo resori o Aksel Ahmedovski.

Fundavutni poenta si te dikhel pe o čačuno numero aplikacie so si dende thaj te anel pe palo odova konkluzia , an o savo nivelo si targetirime i romani kultura thaj an o save kriteriumia i Komisia angja decizia te del o love thaj save kriteriumencar na dengja love e irame proektenge.
Odoleske panda jekh drom apelirinel pe dži ko sa o Romane pravno thaj fizičko subjektua so kerne buti an i kultura thaj konkuriringje baši akaja 2019 berš Progranma te bičhaven informacie ko aplicirime proektonge kobor proektia apliciringje, kobor love rodingje, kobor taro proektia si akceptirime, thaj kobor love dengje len aso olengoro rodairpa.

Odova šaj keren le aso bičhavo e maili an o: Această adresă de email este protejată contra spambots. Trebuie să activați JavaScript pentru a o vedea.

Palo havlajrde rezultatia taro dende love e kulturakere aktenge an o 2019 berš so o Ministeriumi baši kultura akceptiringja len, o bičalipa manifestirinel pe ko sa o riga.
Ko akava konteksti si konektirime thaj o Roma soske sar jekhin so deceniencar funkcionirinel akate.

Ko nakhlo da periodi thaj akana da o Ministeriumi baši Kultura an i R.Makedonia panda jekh drom sikavgja nainteres kana kerel pe lafi e realizaciake kulturakere aktia e Romeneg an i them. Ko akava Konkursi apliciringje pobuter taro 30 proektia taro Romane subjektia so sine hazri te organizirinen kulturakere aktia ko akava 2019 berš.

Palem i Komisia so keren sine buti an o alusar akale aplikacienge sar te sine palem "korole" kobor si importantno e romane kulturake. Sar jekh tikno egzamplo o lungo beršengoro renomirimo kulturakoro subjekti SP BTR Produkcia so beršencar napalal organiziringja buteder kulturakere manifestaciu so mukhle darhi thaj si len rejtingo konkuriringje dujn e proektencar thaj aso o Ministeriumi baši kultura aso olengere "norme" na čajljargje o kriteriumi e Komisiakoro thaj na sine akceptirime ni jekh !
Aso i lista taro dende love kana si i Romani kultura targeti akale 2019 beršeske i Komisija alusargja efta kulturakere aktia taro pandž subjektia - aplikantia. Taro odola subjektia sine rodime saste 40.000 eura , numa i kultura dela salde 12.000.

I Asociacia "Kham sian" bašo liloro " O Đivdipa si dđanlipa rodingja 1.500 eura, a dengje len paše 680 eura. O Jusuf Sulejman pire lileske " Alidžan" rodingja 2.500 eura a dengje le 1.500 eura. I ZŽR "Esma" taro Skopje bašo " Paramisia tari mi baba - notacie mire dizjake" sine rodime 1.750 eura dende si 1.000 eura.
Romano Ilo taro Skopje, duj kulturakere performansenge Romane majsko folkloreskere divesa" thaj " Romano muzikakoro festivali" sine rodime upreder 20.000 eura, a dende si lenge salde 3.000 eura thaj o Ansambl "Rušid Šakir" taro Kumanovo bašo Folk festivali "Jekhipe" thaj o tradicionalno " Roma Truba Fest" taro rodime 15.000 eura dendo si lenge 6.000 eura.
Aso o Ministeriumi e kulturake ko akava 2019 berš i Romani kultura si moldime salde 1.000 eura ko mase! Hari, ma te vakerel pe NULA. Oven saste so amen o Roma siem but moldime . Odova sikavel kaj amen o Romane kulturakere aktivistia te bistra saste i kultura thaj te kera odova so majbut pendžaren amen o avera prekal i muzika thaj bijava. A bogami ked ka dikhe šaj si profitabilno majbut numa i kultura.