Ko vakti tari okupacia trujal 8.000 Jaudie em 32.000 sine zadušime, strelime ko Jajnicia jali mule ko korkoro logori. O logori sine aktivno taro oktomvri 1941 dži ko juli 1944 berš.

O jekhto logorašia sine Jaudie taro Beograd so 8 thaj 13 dekemvri 1941 sine legarde a olemgoro numero sine 5.281. Anibaja e Jaudien tari Banjica, Šabac, Niš, Kosovska Mitrovica, Novi Pazar , Raška , našuthen taro Beograd em maškarutni Europa, o numero taro logorašia ko periodi maškar 8 dekemvri 1941 em dži ko agor e masekoske april 1942 reslje 7.000 kotar so 6.400 sine Jaudie a 600 Roma.

Inače o jevend 1941/1942 sine jekh taro majšudre, Maškar o dekemvri em mart, 500 logorašia mule taro šudro , nasvalipa em bokh.

Ko pavilioni no 4 arakhel pe sine i kujna kote so kerel pe sine o hajbe. Ko dive o obroko sine sar pani, sano čaj, bajato čorba tari armin ili kompiria em hari mumurezeskoro maro.
O eliminiriba taro logorašia kerel pe sine ko phravdo than maškar o pavilionia no 3 i4.

O Roma ko logoria sine ande ko dekemvri 1941 berš sar grupa taro 500 Romnja čhavencar. Ola sine čhivde ko pavilioni no 2 . Olendar 60 mule ko vakti taro jevend taro šudro em nasvalipa.

O aver kotor sine tromaldo ko periodi jauari - mart 1942 berš soske prekal pire amala em paše familia resle te sikaven dokumenti kaj ola bešen ko Beograd, thaj nane sar roma nomadia - bizi adresa. I agorutni grupa Roma sine mukhlo taro logori ko april 1942 berš.

Maškar o 1936 thaj 1945 berš o nacistia likvidiringje upreder 50% Romen tari sasti Europa.
Bizo fakti si li sine odola plinsko komore an o Aušvic -Birkenau, "mudarde zore buti kjeriba" trujal o merdevenia meribaske an o Mauthausen jali egzekutirime thaj frdime an o masovno limoria so korkoro o Roma randingje olen an i Romania - i eliminacia e Romenge an i Europa sine meribaskere efiktea kerdo.

O rezultatia an o thema sar so si Hrvatska, Estonia, Litvania, Holandia jali akanutni Čehia o nivelo tari likvidacia reslja 90% Roma. But masakririme Roma ko purab taro nacistikane formacie meribaske anavkerde sar, Einsatzgruppen, na sine ni notirime em nadokumentirime so sikavel o sumarum gendo taro likvidirme Roma so nane ni fakti ni pendžardo dokumentirimo lil.

I Kolektivno Memoria taro Holokausto bašo genocido upral o Roma sine tikne kerdo salde an o Holokasuti upral Jaudie, kote i Germania pukjinel sine reparacia e Jaudienge a nikana e Romenge thaj o rasno karakteri e romane genocidoske deceniencar sine čhidime kaj o Roma sine notirme sar asocijalizirime thaj kriminalcia. Definitivno i germania oficialno vakergja kaj sine genocid upral o Roma an o 1982 berš.