Erati an o than tari purani thaj saste dži ki funda thardi i gradinka " 8 Aprili" so sine thardi an o mart persi berš. sine čhivdo fundamento tari nevi moderno thaj funkcionalno čhavorikani gradinka.

Te šaj realizirinel pe sa akava piro brao suporto dengja e Norvegiakoro thagarutnipa, hulavipaja 700.000 dolaria. Akale gestoa sikaven kaj si čačutne amala e Romane naciake thaj e komunake.
Bari naiskerin isi dži ko UNDP so menadžorongje o proekto thaj arakhle oleskiri profesionalno implementacia.

Barabutne 482 romane čhave na džan an i škola ko duj fundavutne škole an o Šuto Orizari sikaven o rezultatia taro rodaripa so ko periodi maj - juni akava berš implementiringja i Asociacia "24 Vakti" an o pervazia e proekteske " Inklusia prekal edukacia".
Aso o rodaripa majkritično si o periodo taro jekhto dži ko pandžto klasi kana majbut taro Romane čhave mukhen i edukacia.

" O čhave ikljovena taro fundavno škole taro nekobor faktoria sar so si andrune thaj avrutne migracie, thaj o socio -ekonomikani situacia ko Roma, vakergja o Sali memed koordinatori e proekteske anglal o starti e prezentaciake taro sikavde rezultatia.