O manuša bizi buti, bizo love, bizi agorkerdi edukacia trubul ande kanonea na trubul majbut te bijanen čhave.

Akala aktia sine seriozno formulirime taro dizjakoro šerutne ki romansko diz Targu Mures  o Dan Florea. Oleskere notacie sine editirime ko Facebook em kergje but komentaria taro reakcie sar kaj odova si lačhe, numa em negatvno reakcie.

Klar sine fakti kaj akala lafia taro Florea sine legarde premal o Roma  kote o nacionalistia vakeren kaj si ola demografsko riziko.

O numero taro manuša so kergje protestoa mujal e dizjakoro šerutno ki diz Targu Mures ko nakhlo paraštuj pali akharin tari romani NGO Platforma Aresel. Ola rodingje ostavka taro Florea, kaskere aktia notiringje len sar rasistikane em milantroopsko.

O ko-funderi em presidenti e organizaciake bašo manušikane niamia taro civilno sektori Liga Pro Europa. I Smaranda Enache, so lelja than ko protestoa mujal e dizjakoro šerutno persi paraštuj  oj ilustriringja e Florea sar “ agresivno” em “phagiba e manušikane niamia zagarantirime ko ustav tari I Romania”

Ko jekh liparena kaj ole sine le mangipa ki diz Targu Mures  jekh drom ko 2004 berš te anavkeren premal jekh fašistikano diktatori em sojuzniko taro Hitler o Ian Antonesku. O režimi taro Antonesku  si manuš so kergja mudaripa upreser 380.000 Jaudie em 11.000 Roma. O preanavkeriba e e dromeske sine ačhavdo prekal protestia em krisoskere aktia.

Link: https://taz.de/Rassismus-in-Rumaenien/!5655801/

I ofto beršengiri Natali Mirimanov taro Novi Sad reslja o avgo than ko konkurso baši literatura tari Instituti javno sastipa ki Vojvodina ki tema: „ Lačhe premal peste, lačhe premal o avera“ . Oj hramosargja bašo amalipa maškar olate em i Romani čhaj so sine sako dive telal o terori.

Akava si o teksti tari odoja naracia: 

I Semina si hari pokrupno čhaj , kale tenea, si la kale bala , pothule phovja em pharavde menie.

I Semina sine Romani čhaj kaste but droma olaja diskriminirinen sine la o : Nikolaj, Lav, Aleksej, Srgjan, Dušan, Anastasia em i Nera.

Odova sine ko tikni em bari školsko pausa sa kana odothe na sine i profesorka.

Sare vakeren lake sine bilačhe lafia. Vakeren sine: „ Tu sian melali gjubretarka“

O Dušan jekh drom guringja la ko radiatori. Tegani dikhljum la avgo drom sar rovela. Ni jekh na vakergja e Dušaneske kaj odova nane šukar, ni jekh salde me.

„Dušan odova nane ič šukare so kergjan le! Soske guringjan la ko radiator?”

O Dušan vakergja: „ Odoleske soske oj si Romani“

Mange sako drom vakeren sine: „ Ma le hajbaske tari Semina, soske lakoro hajbe si melalo“ sako drom kana ka mangav sine mo hajbe te hulavav le olaja.

Kana pučljum e Semina: „ So mangeja te kinav tuke bašo tlo biando dive ?“ i Nera vakergja mange: „ Ma kin lake khanči bašo biando dive oj odova ka phagel le“

E Seminake em mange sine but bilačhe.

Ni jekh sa okolende so anavkergjum olen na mangen sine te oven e Seminaja soske sine Romani.

Kana sian Rom, odova ola dikhena kaj o Roma mangen devlenge , kaj si but melale , ama mange ola nane asavke. Akana sium but bibahtali e Seminake, soske oj geli ki Germania, em šaj pobuter nane te dikhav la pobuter.

Mlo mesažo si kaj na troma nikana te dikha e Romen sar avera, soske savore sijam jekh a jekh.

*ki paralela e orginal tekstoa so sine hramosardo tari Natali, irame si salde o anava e čhavengere.

Link: https://luftika.rs/devojcica-sastav-o-romkinji/?fbclid=IwAR3TdREGZCwm9yjPeBYthcjwzIzukW6YO6wvIyioWrmr5vg1XCx6ae-xulk