Ko fokusi e mediumenge taro Paščimalo Balkani jekh taro teme si em o bugarsko embargo ko strati bašo konverzacia ko khujbe ki EU e North Makedonijaja. E sporeske em e problemonge nane te komentirinav m numa ka iranav man ko jekh aver momenti te šaj vakerav jekh fakti. Mo papu o Panta (Lokhi nek ovel leske i phuv) sine ko vakti taro Dujto Lumiakoro Maripa kote so vakerel sine: Avili ki Makedonia em o bugarsko askeri.
Ola avile em ki Topaana o majpurani romani mahala ko Skopje em o Balkani. Premal miro papu o Panta em miri mami i Petra o bugarsko askeri sine odokhare „šukare“ premal o Roma so sako drom kerel sine terori em fizičko maltretiriba , prekal kerde racie, kontrole ko khera mujal o civilia. Jekh drom mo papu o Panta sine odokhare mardo tari bugarijakiri žandarmerija bizi ništo. Phagle leskere vasta, a mi mami i Petra čhivel lekske sine bakhrani morthik te špaj nakhen o ratavrina , a taro maripa ačhilo invalidi pire vastencar dži ko agor e dživdipaske . Odova džanen em o purane skopjania ko sine o Panta.
I Bugaria akana sar EU membro respektirinel li o niamia e minjoritetengoro so dživdinen odori? O akcenti so kamav te vakerav kaj si odori o Romano minjoriteto ki Bugaria?
Kana prepelo o komunizmo em startujngje o demokratslko procesoa ki Bugaria prekal o analitičaria i Bugaria bukvalno čučili. Prekal desave prognoze dži ki 2050 berš i Bugarija ka našavel 25% taro pire dizutne . Ko odova korpusi preperel em i romani populacia kote aso desave notacie ki Bugaria si paše 1 milioni Roma. Ama sar khuvgja ki EU ki Bugaria počmingja o masovno agzoduiusi . Maškar savore em o bugarsko Roma . Soske si odova agjaar?
Fakti si kaj trujal i Romania i Bugaria si ekonomsko majslabo membro ki EU . O faktoria si klar kaj o egzodusi si majbut taro ekonomsko faktori.
Aso desave statistike salde ki EU isi paše jekvaš milioni bugarsko Roma , a šel mile Roma si avrial tari Europa ki sasti lumia. Majdestinacia e bugarsko Romenge si i Germania, Belgia, Holandia, Francia, ama atraktivno si thaj i Britanija, Špania, Skandinavia thaj avera.
Del pe ko jekh o pučiba si li o ekonomsko faktori sar egzodus e bugarsko Romenge. Procentualno oja numa si em aver faktoria.
Sako drom o Roma tari Bugaria sine ko margine e sasoitnipaske . Nikana na sine ki uči agenda taro prioritetoa ki Bugaria em si len bare decenisko problemoa. Odova majbut si i buti, edukacia, sastipa, kherutnipa em aver. Odova notirinena em o raportoa taro aver internacionalno organizacie a ko jekh em taro Romano NGO ki Bugaria so bičhaven sako drom diferentno raportoa dži ko internacionalno faktori.
Odova notirinel em i Internacionalno Romani Unia – IRU em olakere membrora em delegatora so den informacie tari akaja them vash kerde sa anomalie tari them upral o Roma . O IRU buteder droma kergja hramosarde em verbalno reakcie em protestno lila dži ko Bugariakere ambasade so keren pe sine tirtura upral o bugarsko Roma, numa dži ko avdisutno dive nane nisavoi reakcia jali lende akcie em kriseskere decizie. Odoleske akava monenti si importantno bašo masovno egzodusi e bugarsko Romengoro . Odoleske ko nakhlo periodi em akana da taro aktielno politikane lideria sar so si o Bojko Borisov o Karakačanov, Zaharieva em avera keren majbut faktori o Roma tari akaja them te daran em te oven tretirime sar namanuša. Vojvodinovo, Sofija em i romani mahala Fakulčtetite, Pazardžik, Stara Zagora em aver romane mahale sine targeti tari themakiri respresia peraviba e kherenge, policiakere akcie, em aver sistemsko presie upral olende . Jekh taroi egzamplia si Pandemia taro Covid 19 kana buteder romane mahale sine bukvalno phanle em telal o karantini sine dezinficirime em prskime prekal o avionia ki Bugaria. O egzamplo si i romani mahala ko Kjustendil kana sine čhivdi 30 divesa telal o karantin em policisko opservacia . A sa odova vaekrdo kaj si premal o kanonia em majlegalno kerdo.
Te džangjam kaj akana ko mart 2021 berš sis votiba ki Bugaria tegani ka džana kaj akaja antinacionalno mujal o Roma retorika ka bajrol panda majbuteder te šaj ki patriotsko forma te resen o vote kaj ki Bugaria sa si bange em došale salde o „problematično Roma“
O kampanje ka „phajron“ premal o Roma. Odoleske Europa na ohan te jakha anglal o faktia! Ma ov but dujmujali dejbaja e Bugariake 1.5 milionia eura te paj e bugariakiri policia te kontrolirinel e „ riziko nacionalistia Roma“ ko romane mahale kote si baro riziko taro islam radikalizmo em ekstremizmo!
Dikehn hari e nacionalisten sar so si o Karakačanov em avera so si olengiri agenda kaj o Roma si salde pharipa e Bugariake em olengiri eliminacia.
