Taro biathinalipa e Makedoniakoro taro 1990 berš pa dži ko avdisutno dive , ki romani politika prodefliringje pobuter anava prefiksoa“ Lideria e Romane naciake“ formulirime prekal individualno politikane aspiracie sar „Romane lideria“ so notirinen pe sine em okola so sine len Romano politikano partisko subjekti kote sine la em buteder ,e,brora, ama em okola so sine pendžarde sar „Partia – jekh manuš“
Sa okola so sine len ki pli politikani partia prefiksi „Romano“ ola urgentno čhiven pe sine ki pozicia korkoro sar Lideria em akcentirime sine sar „Presidentia savakteske“ PCER, SRM, DSR, OPER, ROM, PDPR, DPR, PIR em avera tikne partie (figuririnena sine , jali panda fuguririnena) ki makedonikani politikani scena. Ko kontinuiteto dikhen sine o trendi te ikljon , em te oven aktivno ko periodia ko sako 4 jali 6 berša lana sine periodi bašo alusariba sar aktivno politikani kampanja pativaja kaj odova lideri , majbut taro okola „paria manuš“ te šaj ple majpašen te čhivel ki buti. Jali neko olendar te ikerel piro biznis intereso prekal tendersko kontraktia.
O Roma ki them aso agorutni statistikani operacia si paše 54.000 Roma a funkcionirinen 9 Romane politikane partie.
Ko odova meči „ko kobor si moldime“ ko sumarom potencialno 40.000 Romane hangia sa o hagija hurdaren pe jali hilavena pe ko pobuter kotora em akana o rezultati si- Salde jekh romano deputato ko makedonikano parlamentoi em ov si membro tari naromani politikani partia.
Taro odova puso ljubomora „Me sium o čačutno romano lideri“ ale o Roma ki akaja deredža.
Te dikhlem realno premal o profilia taro asavke romane lideria akaja da situacia si – super so isi amen salde jekh deputati.
Angleder 10-20 berša šaj sine da asavke anava so notirinen pe sar „Importantno politikane romane anava“ (Faik Abdi, Amdi Bajram, Neždet Mustafa, Šaban Saliu..), avdive bibahtale kaj asavke anava nane.
Palo meriba taro Faik Abdi em Amdi Bajram odova vakuum anavkerdo sar „romane lideria“ akana si- čučo! Fakti si kaj o PCER palo ikljoviba taro Faik Abdi panda nane arakhli čačutni persona so ka legarel akaja partia. Ko SRM palo meripa taro Amdi Bajram akana ka alusarel pe nevo presidento , ama odova nevo presidento ka šaj li te akceptirinel pe sar olakoro lideri da? Odova ka sikavel o vakti.
Premal miri percepcia o avera „veterania“ ki politikani romani scena na sikaven desave apetitia kaj mangen te astaren odova čulo than – romane lideria.
Isi em asavke nesave civilno inicijative , i NGO jali aver civilno asociacie mangen te oven „potencialno faktori“ ko Roma ama ola si nesar „aktivno“ salde ko periodi taro anglolausaribaskere ciklusia em kampanje , ko hulavopa e funkcionenge em avera. Ki akaja „lufta“ periodi nesar nane raspoložime ko terensko udavriba premal o Roma.
Šaj grešinava ama sar džana o bukja majpakjavutni varijanta si kaj o romano politikano bloko te gelo ko kontinuirimo „rasitniba“ ka džan majbut ko naromane politikane partie sar so si o SDSM, VMRO-DPMNE, DUI thaj avera.
Majpakjutno valjani te nakhel but vreme sa dži kote ki scena na avela nevo friško terno kadari ka valjani te kerel pe uniba e romane politikane votakem em te ovel desavo romano politikano faktori ko Romane jakha ama em ko naromane koaliciono partneroa.
Ama trubul te pakja kaj šaj isi šansa. Ko agor bi vakerav. Tma te našava i pakjiv em nadež valjani te ova sako drom džangavde, soske „I nada si suno – e džangavde manušeske“
