Ko 21 septemvri akava berš ko Beograd ki Ginekološko akušersko hospitalo an o drom Višegradska bijandili i tikni Ema. I Ema si čhaj tari Ilda Šaulić a ko jekh thaj unuka e pendžarutne stradno artistoske o Šaban Šaulić.

- Bahtali sium so phergja pe mange i majbaro dživdipaskiri rolja a odova si dajakiri rolja. Pakjava kote ko dživdipa ka ovel man panda lačhe asavke momentia. " - vakergja i Ilda ko vakti kana ikljol sine taro hospitali. Ko hospitali pali olate ale olakoro rom o Bojan Vučković, i daj i Gordana thaj olakiri phen i Sanela sos saste vakti sine bahtale.

I Bajsa Arifovska si unikatno an i lumia tari tradicionalno makedonikani muzika. Oj bašavela majhari ko 15 instrumentia, komponirinela, thaj 11 berša si profesori an o DMBUC "Ilija Nikolvski Luj" kote e siklen educirinel sine nacionalno purane instrumentia. Akana kerel buti sar instrumentalisti thaj asistenti e orkestareske ko nacionalno asambli "Tanec".

Pobut taro 20 berša dromarela an i sasti lumia thaj buvljarel i storia e makedonsko tradicionalno muzikake , thaj okola so respektirinen olakiri buti anavkeren la sar "maestro". Dži akana sine lašel koncertia , kergja buti bare artistonencar, thaj si jekhto Romani so komponiringja muzika bašo baleti.