Ko jekh taro kelie an o phanlipa ko Idrizovo, i phanli Sutkie Mustafova tari Strumica muli sebepi bilačhi sastipaskiri situacia . E phanlipaskoro doktori vakerela kaj ko džuvlengoro kotor e phanlipaske an o 7 juni muli i 46 beršengiri phanli romani džuvlia. I medicinsko urgentno ekipa interveniringja, numa bibahtaje jibstatiringja salde meripa.

Aso vice Nacionalno Obdusmano , Vaska Bajramovska i muli romani džuvli sine krisimi 8 berš phanlipa. Sine phanli an o 2012 berš a ko nakhle nekobor berša sebepi sastipaskere problemia upreder 20 droma sine legardi an o hospitalo.

I ekipa tari olengiri institucia avdive kergja opservacia ko than akale čipotake.

Aso o direktori an o phanlipa Idrizovo, Živko Pejkovski an o phanlipa isi salde 2 doktoria thaj duj medicinsko personali, so keren opservacia e sastipaskere situaciake taro upreder 1.700 phanle.

„ Oj sako drom vakerel sine kaj si la dukha an o kolin thaj aver thaj odoleske sine legardi an o Klinike ko Skopje buteder droma, thaj palo odova iranena la sine an o phanlipa.  Oj trubul sine akava da drom te džal an i Klinika, numa rakjate alo dži ko riziko situacia olakere sastipaske , sine akhardi medicinsko arka . O doktoria salde konstatiringje meriba" vakergja o Živko Pejkovski, Direktoro an o phanlipa Idrizovo.

O trupo tari muli palo rodaripa taro odbusmano sine bičhavdo an i obdukcia an o instituto kriseskiri medicina. O raporti palo odova ka ovel dendo dži ko nacionalno Obdusmano. Sar lipar ko avgo 6 masekoa an o akava 2017 berš ko phanlipa an o Idrizovo mule 6 phanle.

fShare

Tweet