O avgo Roma ki teritoria taro Balkani resle ko maškar taro 11 veko, kana iklile tari Ermenia em chidingje premal i Anadolia, pa posle prekal i Grčka chidingje ko utar.
Palo odova ko 14 veko premal o maškar taro 14 veko arakhle si arhivsko materialia e Romenge ko Zagreb thaj Ljubljana. Pobari grupa Roma ki teritoria tari avdisutni Srbia resen ko periodo kana sine i thagar Stefan Dečanski , a oleskoro čhavo o Stefan Dušan (1348 berš) anela ekstra danokoskoro kanoni salde mujal o Roma so keren sine buti sar nalbantičaria. O Roma angleder da I Osmanlisko imperia sine ko baro numero tari teritoria taro Balkani , a fakti si odopleske kaj sine masovno slovensko anava buteder Romen ko akala teritorie ko avgojekvaš taro 16 veko. Ko vakti tari Osmanlisko imperia e Romen sine len piri teritoria –Sandžako, popendžardo sar Romano Sandžako , amajnglal ki avdustni Anadolia a palo odova em ko Balkani. O Roma majanglal sine hristiansko religijaja a palo resibe taro o Khoraja masovno lena I islamsko religia. Ko starti taro 16 veko (1522 berš) kerdo si o avgo popisi e Romenge ki Rumelia kote anel pe konkluzia kaj ko odova periodo o Roma dživdinen sine ki teritoria tari avdisutni Srbia ko regionia tari Resva, Pirot, Novo Brdo, Novi Pazar, Smederevo, Vranje thaj an o Kosovo (Prištnina, Prizren em Peč). Ko Beograd o avgo popis e Romengoro si kerdo ko 1536 berš.
