O čhavo Dušan Jovanović (13) brutalno sine mudardo taro duj "skinhedsia" ko centro e Beogradeske ko 18 Oktomvri 1997 berš.
O tikno Dušan odoja bibahtali savatoni rakj rodingja love taro po dat te kinel peske soko ki paše dukjana.
E čhave asatrgjele gu 17 beršengere majanglal rodingje lestar pare, a posle peravgje le ko betoni em prencar khuvena le sine ko šero em mudargje le. A mudargje le salde soske sine - Rom.
O akteria mudaribaske sine astarde em krisime a jekh olendar ko krisiba vakergja kaj nane pišmani so odova kergje le.
Pali i tragedia o jeria e Dušaneskere selingje pe taro centro e Beogradeske, ma te setinel olen ko mudaripa olenge čhaveske. Ola gele te dživdinen ko Orlovkso mahala ko Mirjevo.. Taro odova momenti olenge pobuter na sine dživdipa sar jeria e Dušaneske.
I daj oleskiri nekobor droma manglja te korkoro mudarel pe pilja solna kiselina, piel sine hapora, em ko agor ko avgust 2015 berš humlavgja pe.
Trin berš palo o mudaripa taro Dušan oleskoro dat sine le o avgo infarkt, palo odova sine le panda nekobor. Sine le da duj gogjakere infarktia, Sebepi i tromboza sine amputirime leskere duj pre. Mulo ko 2016 berš.
Jekhutne nemo svedoko ačhili i phen taro Dušan i Kristina (19) so si bijami trin berš palo oleskoro mudaripa.
O manuša so mudargje e Dupane a sine len tegani po 17 berša sine o Milan Čujić thaj Ištvan Fendrik taro zemun. Olen ko mart 1998 berš krisinge len po 10 berš phanlipa taro beogradsko krisi, a mukhle sine taro phanlipa palo 6.5 berš sar pašlile.
