Na tromal te ovel mukhlo sa an o pretpostavke soske i them ka lel sa o konsekvence bašo siguriteto ko majučo nivelo baši vizita taro o papa o Francisko an o 7 maj akava berš , sebepi naoficialno havljarel pe kaj o Govermento šaj akava dive te notirinel ole sar bibukjarno dive . Oficialno odothar vakerena kaj akaja informacia ka del pe ko vakti.
O zorale vatikansko protokolia keren i organizacia sar vizitkerel pe nesave uče funkcioneria ko majučo rango zorale kontrolencar ko arakhiba an o Skopje. Sa e sastipaskere institucie ka keren salde urgentno aktia, soske aso o protokolo an i vizita asavke personenge sa se sastipaskere kapacitetia trubul te oven an i funkcia.
I policia thaj e themakere institucie ka ovel olen sasti kontrola ko aktiviteto taro sa o manuša thaj olengoro phiriba ko kotora kote trubul te ovel i ruta taro o papa Francisko ko vakti tari oleskiri dešsaatongiri visita.
Tari i Policia vakerena kaj len pe sa o konsekvence vash efikasno aktiviteti akale historikane akteske an i Makedonia.
An i misa ko papa salde tiketoa. O šerutno kativiteto tari visita taro papa Francisko an i Makedonia ka ovel i misa ko dizjakoro ploštadi. Numa na sako šaj te avel an o akava akti. O sasto dizjakoro ploštadi ko sa o thana kote šaj te avel pe dži odothe ka oven čhivde barikade thaj punktia kote ka šaj te khuven. An i misa ka šaj te len than salde okola so angleder si len lende tiketoa - biletoa so si bilovengere. O Tiketo praktikane ka ovel sar evidenciua sakoneske so ka ovel an o ploštado.
