O Rajnhard Hejdrih sine le buteder aver anava: "ratvalo džanvari", " Dželati" thasj "kasapo tari Praga" - numa ni jekh na ilustriringja o čačipa kobor ov sine realno bilačho.
Sar šefi an o Gestapo , o Rajnhard Hejdrih sine manuš so trubul te del dekretia bašo o majbilačhe nacistikane aktia. Ov sine organizatori tari pendžarutni " Kristalno rakj" (Kristallnacht), zorea genocid upral o Jaudie thaj o Roma an i Germania an o 1938 berš kote odolea startujngja thaj o Holokausto.
Em o Adolf Hitler darala sine taro Hajdrih thaj jekh momenti vakergja kaj si le "sastrunalo vilo". Ov sine majšudro thaj majbilačho nacisto thaj manuš kaste roden le sine kana trubul sine zoralo vast.
O Rajnhard Hejdrih si biame an o 7 mart 1904 berš an o Hale, Germania. Oleskoro dat sine giljavutno thaj germansko nacionalisti. Oleskiri daj sine katoliko.
An o 1931 berš prandingja pe e Lina von Osten. I Lina sine membro an i Nacistikani partia thaj olakoro sebepi ov dikhlja pe e Hajnrih Himlerea so sine ko uče partisko pozicie.
Olengiri konekcia sine bari . O Himler sine em kumo oleskoro avgo čhavo.
An i konferencia ko Vanzeu ov sikavgja o plani bašo Holokausto. Ko odova palno sine akceptirime 11 milionia Jaudie thaj Roma so sine an i Europa. Olende trubul sine te locirinen pe , te phanen pe ko kampia thaj te likvidirinen pe. Ni jekh na tromal sine te ovel mukhlo.
O hejdrih mulo an o 7 juni 1942 berš an i Praga, sine mudardo taro čehiakere revolucioneria. Oleskoro tabuti trenoa sine transportirime dži ko Berlin, kote sine ikerdi i dujto ceremonia (i avgo sine ikerdi an i Praga)
O Holokausto gelo majodorig odole zoralipaja so sine kerdo sar majbaro genocido an i historia.
O agorutno plani sine anavkerdo an i "operacia Rajnhard" sar nota respekto. Odova sine sar oleskoro amaneti.
