O treneri taro romano bokseri Tajson Fjuri, kote o nakhlo savato čhinavgja i 11 beršengiri dominacia e Ukraincoske Vladimir Kličko ki phrai kategoria, phanlja kontrakto bašo revanš meči so valjani te ikerel pe ko dekemvri o berš so avel an o "Vembli".
O bokseria kana parafiringje o kontrakti avgo mečeske , čhivgje thaj aneksi kote o Kličko eventualno te našavgja o meči, ka ovel le niami te rodel revanš thaj te ovel panda jekh meči.
O Romano bokseri Fjuri o nakhlo savato an o Dizeldorf margja e Vladimir Kličko thaj lelja lestar i šampionsko kustik an o verzie VBA, IBF, VBO thaj IBO. O Peter Fjuri kako thaj treneri e Tajsoneske , phanlja kontrakto bašo revanši an o dekemvri 2016 berš so ka ikerel pe ko "Vembli".
" Na mangaja panda akana te kera lafi bašo revanši, numa ka da džovapi e rivaleske" vakergja o menadžeri taro Vladimir Kliško o Bernd Boente.
O Kličko anglal 45 mile publika o nakhlo savato našavgja piro avgo meči palo 2004 berš. O Tajson Fjuri ki pli profi boks kariera dži akan sine le 25 mečia numa ni jekh na našavgja.
