Nekobor berša napalal sa si majbari i natolerancia taro kanadsko ekstremistia upral o emigrantia. Ko akala atakia majbut preperen thaj i romani jekhin, kote si pobut tari Europa, Roma tari Čehia.
O atakia ule majbut kana ko TV sikavgja pe dokumentarno filmi tari čehiakiri televizia kote sikavel kaj i Kanada sar them si but lačhi e Romenge, kote majlokheste avel pe dži ko kher, thaj socialno arka. Palo akala artiklia barilo o numero taro Roma tari Čehia so rodena azili an i Kanada.
Palo akava ko kanadsko mediumia thaj o sasoitnipa barili i natolerancia mujal o Roma. O Roma tari čehia notirinen kaj si sa pobaro numero viktimia tari diskriminacia thaj atakia tari kanadsko policia thaj o skinhedsia. Ola vakeren kaj si diskriminacia thaj taro institucie bukjake thaj ko desave thana isi embargo te šaj khuven ko desave dukjania jali restorania.
Te šaj čhinavel pe o avipa taro migrantia Roma, i institucia e themakiri kerel majbare kontrole ko avipa an i Kanda, thaj ko thana kote si stacionirime o Roma, kote majbut si hostelia jali aver thana. Salde ko Toronto thaj o reoni o numero taro Roma tari Čehia so ale si 2.000.
