Upreder 70% taro naromano identiteti na kamel te khuvel an i prandin e Romencar, pobut taro 50% na kamel te oven an i olengiri familia, a upreder 30% taro anketirime na mangen e Romen te čhiven len an i buti. Odola informacie si alarmantno.
Hulavipa e Romen taro naromane dizutnen si fakti so sikaven o statistike, prekal o lafia taro Ofisi manušikane niamenge an i Srbia.
Ov sar egzamplo dela kote an i diz Niš ko drumo anavkerdo premal o anav tari legenda e romane giljajbaske Šaban Bajramović, ki peticia sine parafirime but manuša so nane Roma thaj na mangen te legarel o anava tari akaja romani legenda thaj si mujal olakoro dejbe anav taro Šaban Bajramovič.
Ko jekh ki pli morthik odova hošingja o žurnalisti taro Niš o Turkijan Redžep kote manglja te kerel kher ki mahala Donji Komren, kote o na Roma na mangle te kerel kher ki olengiri mahala.
Odolea notirinel thaj o Adi Sinani tari organizacia "Civil right defenders" kote akcentirinel plo egzamplo kote trujal so si avukati, o manuša ole dikhen le sar muzikanti.
Trujal so si kerdo but thaj panda ko 2003 berš si havljarde sar minjoriteti an i Srbia, ola vakeren kaj panda dživdinen sar angleder 30 berša.
O faisali dikhen ko institucie kote premal olende trubul te ovel importantno rolja te šaj arakhel pe moduli te faisalkeren pe o problemia so isi e Romencar thaj te tikjnarel pe o rasizmo mujal olende.
