Tehemana Lazar (44), si jekhutni džuvli - trubači an i Makedonia.

Taro tikne berša but interesirinelman sine akava instrumenti thaj normalno sar sako tikno čhavo mangljum te probinav te bašavav le. Kana probingjum, ikljola sine toni so si but čudno jekhe čhajake. Počmingjum te džav ki teluni muzikakiri škola.

Savore pučenaman sine so kamav te bašavav , a me vakerav sine "truba". Sako instrumenti si phar, thaj našti vakerav kaj na sine man problemi. Trubul but praktika e instrumentea so šaj majbuter. Džuvli te lel truba thaj te bašavel odova hari maškar amare manuša si but napendžardo fenomeni. Na dikhel pe odova sako dive.

Me sium persona so trubul te sikavel e Romen , i romani kultura, muzika, i čhib. Persona so del sasti ilustracia e Romenge.

Kerava buti ko duj thana. Sikavav e čhaven romani čhib ki škola "Brakja Ramiz thaj Hamid" ki Šutka a dujto bukjarno than si mange sar profesori muzikake. Sikavav vokali, solfež thaj truba. Odova si organizacija jali škola so legarel anava "Roma Rock school" . Odothe na sikljovaja salde romani muzika, numa sikljovaja thaj aver forme muzika" vakerel i Tehemana.

O thagar e saksafoneske Ferus Mustafov, so si aktivno an o muzikakoro palno, panda kerel instrumentalno performansia pire saksafonea.

Maškar o aver ov si akate an o sako vakti te del suportho sa okole terne muzičarenge so kamena te sikljoven o džanlipa akale specifično instrumenteske.

-Avena terne čhave . Isi but čhave so me sikavgjum olen. Akana bašaven profesionalno. Ma te anavkerav olen , numa ake miro unuko taro miro majphureder čhavo. Isi man taro Veles šukare studenti o Majkl. Palo odova o Džaferi , o Iso em but avera.
Sine man thaj tari Amerika duj džuvlja . isi man em tari Australia so sikavav len sine. Sa ola but šukare sikavgje pe, vakerel o Ferusi.

Trujal so si ov promovirime sar Thagar e saksafoneske , o korkoro Ferusi vakerel kaj ov panda sikljovela. Sar so notirinel o dživdipa si bari škola thaj sako drom sikljovaja neve bukja. Ko pučiba dži kana planirinel te bašavel o Ferusi vakerela:

-Dži kana ka bašavav? Sa dži kote o Devel vakerel te bašavav thaj palo odova te čhinavav, sa dži kote ikeren man mire pire thaj vasta ka bašavav. vakerel o Ferusi.

Akana sig vakti o Ferusi sine kotor taro jekh video proekto so kergje le o "Bumbari Bend" sebepi olengoro jubileo 25 berša aktiviteti an i makedonikani muzikakiri estrada.