Savato si djes savo teljarav gaja kaj phirav pe detharin khetane mure džućelesa, alosarav jekh katar pandž marketura pala burgera ande morro marketo po Trgo Kralj Aleksandar ando Nišo. Te alosares lačho bureko ando Niš si but phare. Naj ande sasti luma gaći marketura burekosa deso ande kava foro.
Gindiv po bureko thaj pala 10-to decembri, Maškarthemutnio djes pala manušikane xakaja. Akhardino sem pe duj kidipa kaj trubuv te phenav vareso „godjaver’. Ni kamav vi akava breš te kerev baro djes kana naj vrama pala goda.
Savorre save pe kava 10-to decembri keren kava djes goda ćeren kerke ilesa situacijasa andi sasti luma. Srbijaki premijerka phenel kaj amare soldatura ka den po Kosovo. E Rusija maj dur kerel piro agresorsko maripe e Ukrainasa,maren e civiluren, muken len bi tatimasko thaj energijako.
Moralno thaj intelektualno infrastruktura e Srbijaki perel tele, prezidento pala SANU ramosarda lil godolese kaj ni kamel maj but te avel pe goda than, žurnalistura thaj e manuša save brakhin manušikane xakaja si dukhadine. Amen e Rroma džas varesar maškar latentno thaj legalno Europako fašizmo thaj i lumja savi dekumaj diljali! Ande sasti Europa e Rroma, minioritetura thaj religijske grupe sar jevrejura, muslimaja thaj kristijanura mujarenpe fizičke atakurenca pe lende.
Oštro publikano narativo thaj phagavipe kotrolako socijalne medijengo ande e anti-. Rromen, anti – Semituren, godolen save phenen kaj naj sasa holokaust thaj e islamofoburen ando mejnstrim but bilačhe konsekvencurenca. Aven mande informacije pala atakura pe Rroma ande Grecija thaj Slovakija. Grecijako policajco marda andar thuvalo ando šorro dešušov brešeske čhavrese savo si Rrom. Ande Slovakija o „Dedamrazo“ ni kamla te del paketići rromane čhavorrenge.Na mangav te xav maj but o bureko!
Si man dar! Paćav numaj ande perutni Micika, perutno thaj phral Bube thaj ande sajekutni savatoski kafava. Ni džanav so ađes te vaćarav pe kala duj ćidimata.Gindivma… kava đes si but lačho xoxavipe save kerde impotentne političara thaj maškarthemutne institucije kontra xakaj thaj čačipe! Biš breša nakhle sar si kerdino zakono pala minoritetura thaj 13 breša katar keripe Zakonosko pala brakhipe e diskriminacijako. Sar te sikavav e manušen kaj egalutnipe ando zakono thaj ando čačo trajo naj jekh-sar-aver.
Sar te phenav e manušenge kaj numaj 0,001 procentura Rromengo kerel bući ande themeske institucije pal minimum duj šela Rroma save agorisarde univerzitetura adžukaren po birovo. Sar te phenav kaj i raštra ni lel sama pe lako šerutno lil (Ustav) godolese kaj si „amalipe egalutne šansengo“ numaj fraza. Kaj ni respektuilpe Zakono pala raštrake butjarn, savo phenel kaj musaj te lelpe sama po egalutnipe kana delpe than butjarne manušenge ande raštrake institucije. So te phenav pala šel purane rromane komunitetura save naj legalizujime pal dživdinen katar starto 20-tone šelbrešengo kontra „kindine“ rromane khera save rromane butjarne manuša na astarde?
Link: https://www.danas.rs/vesti/drustvo/gde-je-tanko-tu-se-kida-kaj-si-sano-gothe-phagavelpe/
