E saranda thaj ofto beršengiri Seare tari Šuto Orizari si mukhli korkoro peske bizi doktorsko opservacia ko katastrofalno sastipaskiri situacia olakere ginekološko nasvalipaja a o institucie ko sistemi si kašuke thaj korole. I Seare trujal so si la ginekološko problemoa thaj si  suspektno kaj si la kanceri ki matka oj ko jekh si pacienti ki dializa thaj trin droma ko kurko valjani te džal ki dializa. >Numa angleder deš divesa o šoferi angja decizia ma te lel la kheral em ma te legarel ola ki dializa, soske “but khandela” em o aver pacientia so džana odole vordonea vakergje odova. Uporal sa e Romnja nane la nisave da dokumentia dživdinel ko ekstremno čorolipa ki jekh čuči sobako Šuto Orizari anavkerdo sar “geto” ki deponia , nane la kašta takjaribaske, struja, hajbe, medikamentia thaj ni avena doktoria!

O „Sloboden pečat“ kontaktiringja e NGO Inicijativa ko niamia e džuvlenge taro Šuto orizari so si jekhutni NGO so kergja sa akale nasvale romnjake I Seara.

I direktorka e organizaciakiri I Salija Bekir Halim bašo “Sloboden pečat” vakergja kaj I Seare ko momenti si khere ki Šutka em ni jekh sastipaskiri institucia na opservirinela la. I tragedia te ovel panda pobari duj čhave akale romnjakiri mule.

Oj dživdinel ko ekstremno čorolipa . Ki tikni soba dendi manušendar so bešena ko stranstvo. Nane la ni takjaribaske kašta. Kergjam zori te la I doktorsko raporto te šaj čhiva la ko desavo hospitali  baši palijantno sevdža, ama odoleske trubul neko te pukjinel. Sare chidenape ki rig. I khand nane taro odova so oj melali numa taro phumb so nane ni jekh so ka tretirinel ola. Amen kingjem antibiotikia , nesave medikamentia bašo hari rook numa valjani o institucie te faisalkeren akaja lakiri situacia, vakerel I Bekir Halim.

Jekhutne so dži akana hari tretiringja e Seare si I Klinika baši ginekologia ko kompleks klinike Majka Tereza  ko Skopje. Odori I Seare sine legardi privat medicinsko vordonea pukjime taro NGO em vakergje kaj šaj te ovel la kanceri ki matka ama valjani dopherde kontrole. Pali akaja kontrola oj sine mukhli khere, aver kontrole nane kerde em akana bešel ko dukkha em bizi sastipaskiri protektiva ki Šutka.

Kana sine kerdo o pregled o specijsalisti vakergja kaj šaj kerel pe lafi bašo karcinom ki matka em valjani detalno kontrola te dikhel pe savi forma si o karcinomi. Sine lake dendi terapija so piel khere a amen kingjam la, em palo kerde sa odola kontrole e Seare e vordonea irangjan mla khere, Kontaktiringjem e Centroa baši dijaliza vakergjem I sasti situacia tari Seare em odothar vakergje kaj ola ka legaren la ki dijaliza, vakeren tari Inicijativa e džuvlengiri taro Šuto Orizar em dopherena kaj oj si salde jekh taro akala aktia ko Šuto orizariu sebepi so nane personalno ginekologo ki Šutka.

Bašo desave dive e Seare nane te ovel la pobut em hajbaske, ni medikamentia a kaštenge našti nit e kerel  pe lafi. I NGO ali ko kontakti e Centroa bašo  socialno vukja ki diz Skopje te keren zori I romni te ovel čhivdi ki gerijatria ko Skopje, jekhutni sastipaskiri institucia kotar so nudingje lake suporto ama odole hospitalizicijake trubul medicinakoro raporti so olate nane ola akanaske.

Ko maškar vakti e Seare si la bare dukkha ki šudri soba ko Šuto Orizari kote si sastipaskere em špsihićko but peravdi, Faktea kaj e Seare nane la ni dokumentia , oj našti ni putrel transakcisko konto baši donacia , em taro NGO dena apeli dći kote neko taro dizutne mangel te donirinel odova neka keren personalno ko ofisi tari I NGO ko drom Indira Gandi numero 50. Majbut valjani kašta takjaribaske, hajbe, higiensko artikloa thaj medikamentia.. Prekal o Centro socijalno bukjenge I Seare legarel pe sar persona bizo kher soske bešel ko nalegalno than. Ola nane la ni jekh socialno arka.

Link: https://www.slobodenpecat.mk/zhena-od-shuto-orizari-so-kancer-na-matka-i-gnoj-ne-ja-nosele-na-dijaliza-poradi-neprijatniot-miris/?fbclid=IwAR0QYZBMPiZt0imt6wir7yC-Hqf1Mv4vO9hLCxY5EkJ8fwlS1iV3qXmn-NE

fShare

Tweet