I ID legitimacia sar majanglal nane privat dokumento numa javno, so dela pe personake te šaj anglal o institucie kanonea te zojrakerel pe oleskoro identiteto . O informacie tari ID legitimacia sar so si o personalno ID numero si kanonea protektirime. O etnikano identiteto si privatno em subjektivno kategoria. Ni jekh identiteti avdive (a ko nakhlo da vakti) nane konstantno konektiribaja em o etnikano identiteto. O manuš šaj te alusarel peske em te iranel o identiteti kana ka mangel ov.
O etnikane simantre nane akana odokhare zorale em si manuša so si len duj , trin jali pobuter etnikane identitetoa, sar konsekvenca taro hemime prandina, migracie em aver procesoa ko moderno dživdipa.
Faktea kaj amaro politikano sistemo em legislativa afirimirinela o etnikano hulavipa em naegaliteto ko sa o dizutne upral i funda taro etnikano preperipa asavko etnikani notacia e dizutnenge ka bajrarel o agjaar akana da baro naegaliteto ko sasoitnipa. Odolea ko tikno udar ki Makedonia ka implementirinel pe o etnikano aparthejd. Bizi notirimi em klar notirimo etnikano deklaracia ko ID legitimacia o dizutne na ka šaj te khuvel ki buti telal jekh a jekh šanse, ka našti te khuvel ko desave diskoteke, bazentia, molia...
Panda nešto. Sar egzamplo akaja “privilegia” ki amari them si e Makedonocen, Albancon, Khoraen, Srbliem, e Romen, Vlahia jali Bošnjakoa soske odoja privilegia ka našti te ovel jekhe Hrvato, Crnogorco, Egjipkjano, Torbeši...?
Akava panda jekh drom sikavela kaj amen siem jekhutni them em sasoitnipa ki lumia so sar funda si baši diskriminacie ki Preambula ko Ustavi!
A deklaririna amen em preperaja ki paščimali civilizacia em amari them si oficialno membro ko NATO!
