An o starti akale beršeske sine incidenti maškar bugarsko askeri thaj duj terne Roma tinejdžeria ko gav Vojvodinovo an diz Plovdiv Bugaria so rezultiringja peraviba sa o khera e Romenge taro odova gav so si nalegalno kerde ki romani mahala.
Palo incidenti o Romane tinejdžeria sine astarde taro Kriso , a o vicepresidento an o bugariakoro Govermento o Krasimir Karakačanov vakergja kaj " O Roma si phare te dživdinel pe lencar thaj keren etnikani natolerancia"
Sar antvorto akale akteske pobuter taro nekobor šel Roma protestiringje anglal o Bugariakoro Govermenti thaj vakergje nane te mukhen o than sa dži kote na ikljovel o Karakačanov thaj saste te jeritisarel pe e Romenge bašo leskiri antiromani retorika.
“Akate avdive sem milja Roma, numa aver drom šaj te ova šel mile Roma vakergja jekh protestanto. Aso oleste o Karakačanov trubul te legarel konsekvence sebepi oleskiri antiromani retorika thaj te implementirinel rodaripa so ulo an o gav Vojvodinovo, soske ko vakti taro incidento o askeri na sine an i buti .
Sar so si akcentirime an i Web rig taro Roma Antidiscrimination Network an o 19 Januari ka ovel protesto an o Brisel so ka ovel legardo aso majbaro nivelo teroro upral o Roma an i Bugaria thaj aver europakere thema.
Ko jekh vakti akana sig planirinel pe o IRU barabutne e OBSE, ERTF thaj aver organizacie te keren mitingo e bugarsko themakere instituciencar te keren diskusia vash akaja situacia.
