O agorutne nekobor berša o politikane Romane partie ko jjekvaš taro masek Januari tradicionalno organizirinela romane balia. Akava da berš si isto. O šerutne lideria e romane politikane blokoske organizirinena Romane balia pire manušenge so si len "majhor džepa"
Te šaj ovel pe kotor taro akava fenomeni o romano "džet seti" pukjinel taro 25 dži ko 50 eura ko dženo. A sebepi epiteti " balkansko", " europakoro" thaj "lumiakoro" bali o lokacie si pendžarde skupo restorania, hotelia thaj sportsko arene.
O organiziriba akale romane balenge si džando em sigurno biznisi. Upreder 1000 misafiria i matematika si prosto. O organiziriba akale balenge thaj o profito si baro. Akava havel pe em okova so organizirinel thaj okova da so avela ko bali.
Tari dži akanutni praktika, lokheste šaj anel pe konkluzia kaj amen o Roma an i Makedonia dživdina ko duj diferentno paralelno universumia, dži kote jekh hana piena ko Romane balia, aver Roma phareste ikavena hajbaske da em si bokhale. Ko odola organizirime "džet set" party kote sar egzamplo avena paše 3.000 romane džet seteria, so pukjinen tiketo bašo te khuven em te han te pien thaj extra dende love sar so si garderoba, frizura, stajlingo , transporto em "lepiba" love e muzikake, o love resen ureder 20 thaj 25 mile eura!
Aso relevantno raportia so taro themakere agjaar taro internacionalno institucie thaj NGO baro procento taro Roma an i Makedonia thaj ko akava XXI veko dživdinen ko supstandardno trujalipa. Baro numero taro okola Roma so na sine akharde te len than an o akala Romane balia olen nane len love hajbaske a na baleske. Džanaja kaj neko akalestar profitirinela - odova si jekh rig, a i aver rig dživdinela maškar kontejneria bašo gunoj kaskere dada džana em khedena plastično šišia.
Si li o Romane balia salde sar politikano biznisi? Ko odola balia sar normalno akharde si thaj o majuče themakere funkcioneria (premieri, ministria) resarinaja te ovel len majbaro rejtingo anglal pire simpatizeria thaj anglal o politikane partenria thaj o "bare" te keren "bildiriba" anglal olengere jakha.
Kergja li neko taro organizatoria (konektiribaja em o Roma so aven ko balia) te del pe godi kote o Romano Bal šaj te ovel em humanitarno karakteria thaj o love so ka kheden pe taro o barvale te den pe sar suporto e "čhavenge pe droma" jali te den hajbaske odola loveem te parvaren upreder 5000-6000 bokhale muja!
Numa dži tegani o Romane balia ka keren zori te oven kerde sar najšuže paramisia, dži tegani o "resto" Roma ka oven " Cinderela - Pepelaška" an i akaja amari them?
Autori: RDS
