An i utsavali atmosfera thaj anglal o misafiria an i Kinoteka e Makedoniakiri an o Skopje, ikergja pe ceremonia ko deiba o phursakoa bašo majsukcesiale akaleberšeskere 17-to Internacionalno Romano filesmkro festivali "Somnakaeskiri Rota 2019".
O sasto filmsko festivali si an i organizacia tari SP BTR Produkcia.
O festivalsko žiri akava berš angja decizia an i konkurencija taro selektirime 18 filmia so sine an i duj e divesengiri programa an i prezentacia sar filmi so legarel o phursako Grand Prix te del pe e filmeske " I Rig taro miro lil" an i režia tari Gajlja Stojaneva tari Bugaria.
Ko jekh o festivalsko žiri debgej aver phursakoa thaj plakete. Akaleberšeskere nominacie lele: Implementacia e Romane strategiake - " Miri edukacia avdive - bašo majlačho tajsa" bašo o Roma Resource Center - RRC - Skopje, Majšukar muzika bašo „Amen siem i trampa„ bašo NRC - Kumanovo, Majšukar scenario "O čhave thaj o čorolipa" - Produkcia 3 PIX Media - Skopje, majšukar režia e filmeske „Avri tari Romta - Fantomia an o sasoitnipa" - Iniciativa bašo socialno trampe – InSoK, Skopje, sar majšukar dokumentarno filmi havljardo si o "Sa o Roma" an i režia taro Daniel Petrovski thaj specialno phursako taro Žiri si o dokumentarco "Lošalo si miro romano dživdipa" scenario thaj režia Ljudmila Živkova tari Bugaria.
An o pervazia e festivalekse sine dende aver da plakete thaj diplome bašo aver subjektoa so dengje piro suporto baši sukcesiali realizacia akale festivaleske thaj trin diplome sar phursako e čhavenge an i realizacia e "Jekhminuteskoro video".
Ko agor o roganizatori e festivaleske Zoran Dimov anglal o misafiria lipargja aso o agorutno persiberšeskoro produkto "Lokalno heroia" so lelja than an o buteder taro 20 festivalia thaj reslja pobuter phursakoa, thaj an o jekh havljargja o avutno proekti baši realizacia a odova si o dokumentarco baši historia e Romengiri "Del - Rota- Phuv".
Te notirinel pe an o agro kaj akava da filmsko festivali finansiski suporto dengje o Filmsko Fondi tari Makedonia.
