An i piri barvali nacionalno historia upreder 1000 berša o Roma sine pendžarde sar manuša artistoa.
Trujal sa ola sikavgje pe sar cirkusko artistoa sar so si žongleria, akrobatia thaj aver so sine lengiri profesia.
Ko jekh rodaripa akcentirinela pe kaj i avgo romani cirkusko trupa an i teritoria tari Europa sikavela pe panda an o 1322 berš. Oj reslja taro Egipet an o Carigrad thaj gejnel sine 20 džene so keren sine but riziko performansoa an i arena. Odoja grupa an o 1323 berš prekal o Carigrad thaj Trakia reslja majanglal an i Makedonia thaj palo odova geli an i Srbia.
Ko odova vakti an i Srbia sar thagar sine o Stefan Uroš II jali majpendžardo telal o anav Dečanski. O grčko historičari Nikifor Grigoras ilustriringja odova cirkus ko plo lil " Historia e Vizantiake"
Aso oleste odola cirkusko preformansia an i Srbia keren sine sa odola aktia so keren sine thaj an o Carigrad. Akala prezentacie keren sine len em ko Prizren, Skopje thaj aver dizia. Majpakjavutne akaja grupa Roma cirkuzantia palo odova geli nekote an o Paščim, majpakjavutne an i Špania. Akala dokumentia sine sar fakti kaj o Roma sine an o akala teritorie an o odova periodo.
Palo odova ko vakti tari Osmanlisko Imperia so ali ko akala teritorie isi siguritetno hramosarde lila kaj o Roma sine ko akava regiono. Jekh olendar si jekh lil statistikane gejnipaja taro 1491 berš kote notirime si kaj sa o registririme Roma sine len hristiansko religia thaj o Turklie kana avile ko akala thana o Roma sine odothe.
