„Cigani„, „Gjupci„, em aver forme identifikacia e Romenge ule sar normalno buti majbut prekal o socialno mediumia.
Manuš te drabarel o komentaria thaj olengere ande konkluzie e Romenge ka havel kaj o Roma si sar monstrumia.
Egzamplo ako kergje nesavo nahumano akti pinda nasociajlizirime grupa Roma ki them ola startujnen pire ragalencar em generalizacia sar so si "Cigani" Gjupci", "Čergaria" Em palo odova arsena dopherde kvalifikacie na individualno, jali grupake numa saste generalizacia e naciake em dopherde formulacie : Čiram bibukjarne, narkomania, melale, hohavne em aver ilustririnena sa e Romen
Abe manušalen kaj dživdinen tumen ? Premal tumen "tikne gogjaja" so den komentaria si li potencialno riziko dži kote desavo čahavo "Ciganče" bešel ki škola barabutne javere gadžea isi rizikmo te čorel lestar o penkalo, i tetratka ili o hajbe?
Ili desavo "Cigan" so kerel buti ki desavi kompania em isi len barabutno ofiso pire kolegaja šaj odova Rom te čorel tumaro mobilno, love jali lap -top?
Šaj li nesavo tiro amala so si "Cigan" te ladžavkerel tumen ked ka ikljoven ki jekh kafa?
Šaj li slučajno ko tumaro kher desavi "Ciganka" so kerel ki tumende khere buti so čistinela, thovela ili arakhel tumare čhave isi riziko te čorel tumen sa kheral ili te čorel e čhave?
Panda majlogično pučiba . Kotar odova eksluziviteto ko javer anav kaste na pendžaren but šukar te hramosaren ko oleskoro anave oleskoro CV?
Eeee mire manušalen "kovle vilea" odova so tumen ilustririnen generalno averen sikaven tumaro narcisoidno karakteri em dilino mentalno karakteri a na i "genetika" sa e Romengiri.
Ko agor o lafi "Cigan" nane nisavo anava jekhe naciake numa karakterno formulacia so šaj korkoro tumende ilustririnen save sien tumen!
Ki asociajtivno forma o hramosarde dokumentoa so datirinel taro XI veko o lafi "Cigan" si taro grčko lafi Athinganos - τσιγγάνοι jali ἀτσίγγανοι кso ki odorutni translacia ko odova vakti sine , na mangav te astarav le оa avdive si sar etiketa sar, melalo, čor, hohavno bilačho..
Sar alo odova lafi e Romenge so avile tari India?
Ko upre anavkerdo regiono angleder te aven akala romane grupe sine jekh grupa "sektašia" so keren sine sar magie em sine čhudime ki rig sar Antihrsitia em anavjerde sar "Anthigani " Kana avile i etnijani grupa Roma sebepi so si sar odoja anglutni grupa o aver manuša so dživdinen sine ki odoja teritoria thaj sine dominatno ola gindinen sine kaj si odoja sekta em notiringje len odole anavea sar - Athinganos.
