Javinate paše ko 01:00 o časo pali i jekvaš i rakj bare jaga saste thargje i čhavorikani gradinka "8-to Aprili" an i komuna Šuto Orizari. Tari teritorijalno mujal jagakiri jekhin vakerena kaj resle 25 minutia palo odova , numa but phareste resle dži ko than.
Upreder 100 čhavore tari akaja gradinka našavgje pire igračke, bešljarina, measle thaj than vbaši edukacia. 130 čhave ko Diveseskoro centari e čhavenge ko droma so sine akomiodirime ko akava objekti, našavgje piro "kher".
Aso o informacie tari Mujaljagakiri brigada ola resle akharin paše ko 00:55 o časo baši akaja bari jag, palo so aktiviringje pire ekipe thaj vordona.
Sar sonotiringja o komandiri akale brigadake Zvonko Tanevski olengere ekipe, iklile an o tereni, numa i bari jag sine ki buvljardi faza.
- Kergjem aktivacia e vordonenge , numa i jag astargja pe but bareste so o objekti sine le upral limi thaj kergja panda pobaro pharipa baši intervencia , numa kergjem sa te ikera i bari jag telal i kontrola. Ratvarde nane, numa isi baro materialno zijani - vakerel o Tanevski.
Ov informirinela kote taro javinate o ekipe panda si an o tereni .
Sebepi so pali kerdi intervencija tari brigada na sine šajdipa te kerel pe opservacia, oj akana akala momentia kerela pe thaj o lendo materiali ka oven bičhavde te kerel pe opservacia thaj o faktori akale bare jagake so sine an i gradinka.
I Irena Velkovska , legarutni e Diveseskere centroske, vakerela kaj an o akava momenti isi suporti taro romane NGO sketori so si an o Šuto Orizari thaj ka len e čhaven sa dži kote na arakhel pe desavi aver opcia thaj faisali.
I Komuna pakjala kote o ministeriumi ka kerel angažmano te kerel pe jekh asavko nevo objekti tari gradinka.
You tube: