O Romano nevi berš - Vasilica kerel pe taro 13 januari rakjate dži o 17 januari, thaj ko akava dive čhinela pe papinja, misiria thaj o šero valjani te ovel irame premal i rig kotar ikljola o kham te manglen o berš te ovel berekjetlia!
I Vasilica si baro dive majbut e Romenge tari Srbia, a isi Roma so keren akava baro dive thaj an i Makedonia, thaj aver Balkansko thema. I data so 14 januari, ko dive kana o hristiania utsavalkeren olengoro dive Sv.Vasili jali hristiansko Nevo berš. Trujal so o purane Roma majbut si muslimania akava dive keren le salde premal tradicia so si taro periodi kana ale o Khoraja ko akala thana, kana o Roma majbaro procenti sine hristiania.
Baši Vasilica majbut čhinela pe sine papina thaj misiria, khanja thaj aver. Šaj sine te čhinen pe kobor so mangel manuš, athinalipaja kobor si barvalo jali čorolo, thaj kobor misafiria akharel, numa majimportantno si o numero ma te ovel pari. O papina thaj aver so ka čhinen pe ko 12 jali 13 januar rakjate, a neko čhinel thaj 13 jali 14 javinate, sar ko kerel sar tradicia ki pli familia.
O papina čhinel o kherutno kote pomožinel ole panda jekh paše tari familia. Oj čhinel pe satarea ko trupco, kote o šero tari papin jali javer mora te ovel irame ki rig kotar so ikljola o kham. Okola so čhinen valjani te oven nangjarde. Akava si sar pagansko tradicia. Majbari loš si te sine i papin,. o misiri jali i khani thuli soske pakjala pe kaj o berš ka ovel panda majberikjetno. Odoleske kinena sine papina, misiria, jali khanja angleder i Vasilica te šaj te parvaren pe thaj te oven panda pothule.
Ko disave popurane familie sine adeti da te phagen guruveskere pre te keren pača kote giljaven sine thaj gilja. Rakjate ko 12 januari ko trupco o domakini e khereskoro phagel sine o kočia taro guruv thaj giljavel sine gili:" But sastipe bičhavav me dajake me dadeske. Te bičhavav lenge but baht thaj sastipe. Ko lengoro anav kerav i pača"
Ki Vasilica ko 14 januari javinate o polazniko avel ko kher. Ov frdel pani, e kherutnen khuvel ko šero, frdel mumuruzi, pirindži em love thaj vakerela: " Bahtali i Vasilica".
O polazniko si arakhlo tari familia. Oleske dena love šeja thaj gudel.
Rakjake ko 14 januari kerel pe o hajbe. Kerel pe sine čorba, pherde babure, peko mas taro papinja, khanja, misiria em salata. Den sine em piftia - pača. Ki odoja rat bešel sine salde i familia khere a na javer misafiria.
Ko disave romane mahalae, sine asavko adeti kote o polayniko ked avel sine pučel sine e domakjine e khereskoro taro udar, a o domakini adžikerel le sine ko astali pherdo hajbaja e lafencar : " Dikheja man_". O domakjini del džovapi_ " Dikhava tut". Te gani o polaznioko iranel lafencar : "Akava berš dikheja man, dži berše ma te dikhe man" - mislibaja kaj taro pherdo astali hajbaja dži berše te našti dikhel e polazniko thaj i trpeza te ovel pherdi.
Ko odova dive kerel pe sine pogača jali kačamako thaj čhivel pe sine metalno moneta, thaj ko ka arkhel la sine odova berš ka ovel oleske majbahtali
