Ki akana sig kerdi TV debata anavkerdi sar TV DUEL ki germansko televizia kote sar misafiri sine o ex CDU generalno sekretari o Hajner Gajsler dengja piro stavi ki konekcia e Romencar taro Balkani so aven an i Germania thaj roden azili.
Ko pučipa sar trubul te dikhel pe e Romencar taro Balkani ki olengiri procedura bašo rodipa azili an i Germania, ov bičhavel bari kritika dži ki olengiri paše partia i CSU, kote kerel zori majsig paldiba e Romen palal an o Balkani.
O Hajner Gajsler ki emisia notirinel kaj o minjoritetia taro Balkani trubul te len azili, soske ola sistematsko si diskriminirime. Ov maškar o javer notirinel :"Jekh romani familia tari Makedonia jali Bugaria resel ko masek sar socialno arka bizi diferenca kobor si bari i familia arka taro 25 eura. Akala manuša si diskriminirime ki čačutni forma e lafeske.. Odoleske so si diskriminirime olen si len niami e Romen te len politikano azili an i Germania. Sa javer forma si teleperaviba e Romen. O migrantia so aven taro Balkani si 40% taro persone so roden azili an i Germania. Ola dži ko azili resen but hari.. Odoleske olengoro akti trubul te lel pe bare samaja thaj te keren o legarutne CDU thaj CSU te šaj den azili e Balkansko minjoritetenge. O Gejsler notirinel kaj si paradoksi akale manušenge te sigjarel pe i procedura bašo iraniba napalal soske ola si diskriminirime an o ple thema. O problemi emigrantencar i Germania šaj te arakel javer forma bašo te faisalkerel. Neka kerel pobari kontrola ko simantre. Ko momenti isi 600.000 manuša kaskoro statusi sar emigranti si napendžardo ki sasti forma. Kobor olendar ka ačhon odova salde e germaniakoro govermento džanel. Numa 10.000 jali 15.000 azilantia taro Balkani nane nisavi daravin thaj problemi e Germaniake. Oj šaj arakhel faisali olenge.
Numa akaja birokratia trujal i Germania, majbaro defokusi kerel thaj i administracia taro Brisel thaj EU.
