Angleder jekh berš kana angja pe decizia kaj o Roma tari Makedonia džana majbut te roden azili ko thema tari EU, thaj sare okola so ka teleperaven i vizno liberalizacia,
angja pe decizia kana ka oven deportirime odola Roma napalal an i Makedonia te len pe olengere pasportia sar globa thaj jekh berš te na šaj džan avri tari Makedonia. Odoja decizia ali anglal o Upravni kriso legargja pe inicijativa te šaj peravel pe odoja decizia sar naustavno.
Angleder jekh berš o manuša so keren buti anglal o kriso notiringje akava kanonikano akti sar naustavno, premal o ando kanoni an i RM ko 2011 berš te lel pe o pasporti savorenge okolenge so si irame taro thema tari EU sar so vakeren sar "hovavne azilantia", thaj ma te mukhen pe jekh berš te ikljon tari them avri. Akala aktia sine ande te daraven pe o aver potencialno manuša so ka ikljon tari Makedonia ko thema tari EU te roden azili. Majbaro procento olendar sine o Roma.
Numa o ustavno adalati angja decizia kaj asavki konsekvenca našti te kerel pe upral manuša so roden azili, numa isi trin kategorie kastar šaj lel pe o pasporti. A odola si: Te kerel pe protektiva e siguritetske tari them, Te sine mujal odoja persona legardo došperavipaskoro akti, thaj protektiva te sine riziko e sastipaske mujal o manuša.
O azili na preperel an i akaja kategoria!
O pučiba si aver. Sar šaj te mangen te ananen asavki decizia?. Soske baš e Romenge so roden azili _. Soske na anen decizia okolenge manušenge tari Makedonia so isi majbut paše 400.000 themutne (a majbut olendar si Makedoncia), so lele bugarsko dokumentia - pasportia, kote olendar 90% si hovavne deklaririme kaj si Bugarsko themutne?! Ola peraven o rejtingo e Makedoniakoro thaj bikinen piri them salde bugarsko pasportenge te šaj keren buti ko thema tari EU. Olenge nane nisavi konsekvenca! Ola teleperaven o identiteti e Makedoniakoro , a na o Roma tari Makedonia so džana sebepi majteluno nivelo socio - ekonomsko inkluzia an i them.
