Nekozom dive, masekija, berša kerela pes lafi ko socijalna mreže sar o Rom e Romeske te arakhel greške te shaj peravela pes odredeno manushengoro avtoriteti, vlijanie sar ko lično aghar em ko profesionalno dzivdipe, a soj naj tragično em sa adava kerela pes ki literaturno gadzikani chib, te shaj o gadze dena amen aplaus bashi o vnatrešna etnička ne-haljoviba.
Sikavela pes koj poviše vredinela, koj poviše like ili komentarija ka khedel adaleja so skoro ista manusha lajkujnena em komentirinena, adava nane merilo baši tumaro vidlivost a ni pa merilo kozom sijen vlijatelno, sekoj nesar kerela i diskusija deka trebola te dikhel pes o kolektivno buti keribe, a ustvari sekoj dikhela individualno interes, adaleja so merinela kozom vredinela.
Sekako deka sekoj isi le individualno vrednost, ama adaja vrednost trebola te ovel sar dodatno vrednost jek jekheske, adaleja so trebola te dzana sar te chiva o individualizam ko kolektivnost, jek puti cache te kera zaednicko buti e zaednicake, soske ko sekola amare diskusije vakeraja i zaednica achili palal, o javera kerena amenge diskriminacija, segregacija em sijem lenge nevidliva ko opshtestvo, a so keraja amen sar kolektivi ili sar indivudualcija te smenina adaja slika ? (Kovinaja i shajka panda po hor).
Sar individualcija shaj prvo te pucha amen, pred te khuva ki diskusija taro bi dzandipe, samo te nakhava amaro vreme ko socijalna mreze, soske avdije arakhljagovaja ki asavki situacija ?
Odgovornost trebola ili puchiba te postavina e manushenge kaske glasingem ko odredena izborija, ako i lokano problemi te obratina amen ko Gradonacalniko, ako i nacionalno problemi onda te pucha e manushen kaske glasingem ko parlamentarna izborija.
Adala manusha kaske glasingem phiravena o naj baro odgovornost te den amen odgovor ko adava puchibe soske i zaednica achili ki akaja situacija, soske ola kreiringe navodna politike pire koaliciono partnerencar sar te podobrinen o dzivdipe e Romengoro ki drzava, trebola te vakeren so blokiringa ili soske ne-uspeshno implementacija isi li nesavo problemi soske na unapredinela i zaednica ko sistemska reshenija ki inkluzija ko sistemi, ili pa sikavela deka i dzi akanutni politika kerena la nekompetentna manusha ? Pa akana keda i zaednica preku razna inicijative preku svezo energija probinela te promeninel o narativ dzi ko pristap, ushtena taro hor sojbe odredena politicka partije i khuvena ki diskusija kritikencar prema ki nevi svezo energija ?
Trebola te prifatinen deka odoborka sine lengiri sila, deka dzi akate aghar shaj kerge, soske adava vreme sine po javer kote o gadze nudinena sine olenge nesave vrabotena thana kola so promeninena lengiri licno sostojba, ama na e zaednicakiri, adaleske da puchaja amen dali dikhaja « Kolektivnost ili individualizam », ako dikhaja kolektivnost onda cache tano vakti te ikljon em te vakeren deka ola taro piro iskustvo greshinge ko odredena bukha, deka i terni svezo energija, inicijative trebola te preskocinen adala greshke kola kerge olen ola, za da ma te nakhen taro isto drumo o idna generacije kola mangena te anen rezultatija kolektivna pire zaednicake.
Panda jekhe bukjaja ka zavrshinav akaja kolumna, so ko posledna dive iklili officijalno – neofficijalno informacija, deka o Pretsedateli tari Politicko partija PCER o Rajo Samka Ibraiomovski mangela te kanditirinel pes bashi Pretsedatelska izborija ki Severno Makedonija.
Adava jek strana tano shukar Rom kandidati te ovel amen, ama trebola te razmislina dali adava ka sikavel e mainstream partijenge kozom vredinena o Romane glasija ili pa ka stetinel amenge sar romano elektorati ? Te obrazlozinav ako cache beshena sa o Romane PP palo 1 kandidati em adaleja ka sikavel pes bashi o parlamentarna izborija kozom tano o Romano elektorati adava ka ovel zoralo merilo, ama dali verujnena deka sa o Romane politicka partije ka beshen palo 1 Romano kandidati ko prvo krugo ( soske po dur nashti dzala), dzanindor i frakcija so slucinela pes keda o gadze dena amen hari vaznost em khuhvena amen ko pike, sigate bistraja o kolektivnost odma mislinaja ko individualizam, lenge so ka pasujnel te zavrshinen pumare licna bukja.
Tari dujto strana pa, ako dzala Romano kandidati kova tano « deja vu » sar o Samka Ibraimovski, nekoj tari holi taro inati nane te kerel buti pire clenstvoja te podrzinen i kandidatura nego ka den o glasija ko gadzikane kandidatija, i zamilsinen Romano kandidati ikljola deka isi le samo khedime 7000 glasija, savi poraka ka bichavel pes dzi ko mainstream partije bashi o Parlamentarna izborija ?
