O web portali Roma Times kerel seriali taro eksluzivno intervjua. Akava drm e aktuelnoi dizjakere šerutne Rom ki jekhutni romani komuna an i Eurpa ko Šuto Orizari.
Roma Times: Rajo Duduš thavdel tumaro dujto mandati sar dizjakoro šerutno ki komuna Š.Orizari, objektivno okbor sien čalo tar dži akanutno aktiviteto an i komuna?
Kurto Duduš: Faktea kaj siem komuna majtikne budžeta an i them gindinav kaj resljem but. Akate ka gejnav aktivitetoa so si len krucialno fakti amare komunake ko lačharipa e kvaliteteske taro dživdia thaj lačharipa e dživdipaskere trujalipaske:
Protektiva taro bare panja ko teluno kotor taro Šuto Orizari, 5.2 km atmosfersko kanalizacia , rekonstrukcia ko sa o pobare šerutne dromia ki sasti komuna, led smart rošaripa, tamikeriba čhavorikane parkia, vazdiba thaj savakteskiri eliminacia taro sa deponie ko andruno kotor amare komunake, rekonstrukcia thaj nevikeriba ko duj fundavutne škole thaj nevi čhavorikani gradinka thaj but aver proekta.
RT: Prekal tumari gind ko save umalja reslen majbut, a ko save umalja na kergjen ko sasto aktiviteto?
KD: Šuto Orizari taro lakoro fundiriba pa sa dži ko mlo avgo mandati sine but mukhli komuna trujal uprenotirime aktivitetoa isi panda but buti te kerel pe , numa amen akate na ačhovaja džaja jekh a jekh tempoa sa dži kote na kera sa notirime amare resarina.
RT: Kova si ko momenti tumaro majbaro fokusi ko tumaro butikeriba?
KD: Prioriteto numero 1 si DUP , zaruriba te anen pe plania si taro krucialno aspekto , buti so trubul te kera e dizutnenge , te šaj i komuna te buvljol, te zojrakera amen ko ekonomikano aspekti planencar taro neve trgovsko industrisko zona kote dikhaja potenciali ko avutno bukjarnipa, soske sar aduti si amen ki amri komuna buz terne Roma so nane len buti.
RT: Sar notirinena i džiakanutni kolaboracia e themaja (Govermenti), em dali oj dela saste bašo prioritetia e Romane jekhinake fokusea Š.Orizari?
KD: Sar jekhutno Rom dizjakoro šerutno ki jekhutni romani komuna an i Europa em buvleste sako goveremnto konektiribaja em amaro trubul em valjani te del majbaro suprto numa so akana praktikujnela ko momenti, trubul te len pe o faktia sa o trujalipa, i situacia so arakhel pe i Romani jekhin amende, numa em avrial tari amari them em te kerel te ova egzamplo ko regiono, soske amencar si len partneri so si len timi thaj proektoa so šaj keren realizacia ko sa o rodaripa tari Europkairi Komisia (ekonomikane thaj socialnoi niamia, kherutnipa, edukacia, bukjarnbipa, kultura thaj džuvljakere niamia).
RT: Dali planirinena te kandidrinen pe bašo panda jekh mandati sar dizjakoro šerutno ki komuna Š.Orizari ?
KD: Akava pučiba ka mukhav e dizutnenge te vakeren, miro mandati si dži ko novembro 2025 berš em o dizutne te rodingje odova mandar mange si savala te džav majodoriga e pozitivno trampencar amare jekhinake thaj modernizacia amare komunake.
