O Kurto Duduš, dizjakoro šerutno ki komuna Šuto Orizari tari rig e krisaroske Gjoko Ristov taro Kriso reslja decizia krisoskiri opomena prekal dendo privatno krisoskoro akti taro Demir Ismail.
Ov sine došakerdo kaj kergja ratvariba . O Ismail ko kriseskoro akti akcentiringja kaj persi berš ko vakti taro Romano bal so sine ko “Aleksandar Palas” sine khuvdo taro Duduš.
O Ismail vakergja kaj faktori soske sine khuvdo si kaj oleskiri NGO doniringja hajbe em šeja e Romenge tari komuna, em kaj odova smetingja e Duduše em na mukhel sine te kerel odoja akcija.
O kriseskoro proceso startujngja em agorkergja bašo biš minutia . O Duduš em o Ismail resle ko krisi pire advokatoncar anglutne ande deciziaja kaj o Duduš ka vakerel kaj si čače došalkerdo te šaj agorkerel e kriseskoro akti.
E dizjakoro šerutno taro Šuto Orizari vakerel kaj o akti sine kerdo telal o afekti.
– Oficialno jertisarav man oleske . Te šaj te iranav o vakti nane te kerav sine odova – vakergja o Duduš.
O Miki Vučić advokati taro Kurta Duduš vakergja kaj but si bahtalo so agjaar ko jekh civilizirimo forma agorkergja o sasto akti.
O Ismail akcentiringja kaj akana ka kerel civilno kriseskoro akti em ka rodel love taro Duduš , a o love ka donirinel len humanitarno.
Kana o duj riga prekal urgentno akti notiringje sar tergjon o bukja o krisari Ristov na ačhilo le aver trujal so e Dudušeske dengja salde kriseskiri opomena.
