O Simeon Atanasov (44), o posvoimo čhavo tari Esma thaj Stevo Teodosievski kote oleskere duj čhave legarena olengere anava , taro plo 7 berša dživdinel sine pire muyi;ko mentorencar ko Beograd, majanglal bašavela sine tarabuka, a palo odova ulo kotor tari estradno škola taro Stevo Teodosievski em membro ko “Esma-Ansambl Teodosievski”. Palo odova počmingja te bašavel ki harmonica ulo lačho muzičari em kompozitori. Ov si autori taro baro numero gilja so kergja I Esma , a palo meripa e Stevoske ulo lideri e “Esma – ansambl Teodosievski” so palo odova ulo “Esma bend” em bašavgja ko upreder 3.000 koncerti ko sa o kontinentia.
Ov vakerel kaj lungo vakti počmingja te hramonjel lil , kaskoro akana bukjarno anav legarela sar “O profesori Stevo em amen”kote so ka sikavel but napendžarde faktia konektirime oleskere dživdipaja em o dživdipa sa e čhavengere so posvoingje len I Esma em o Stevo.
– O lil počmingjum te hramosarav le angleder te merel I Esma . Ka ovel but čačutno em phravdo lil ka vakerav but bukja , ka phravav saste mo ilo. Džanav kaj buteder ka oven iznenadime . Ka ovel em odova amaro džajbe ki “Eurovizija” em soske I gili “Imperija” sine irami kaskere autoria siam sine me em o Borče Nečovski, bašo odova so na dengje amen dozvola te kera kher ko Vodno, e bare sukcesenge, koncertoa, turnee, ama em but aver bibahtalipa. Kerav kolaboracija e pisatelea Aleksandar Kujundžiski taro izdavačko agencija “Antolog” so del ma suporto ko hramosariba e lileske, vakergja o Atanasov.
