Autori: Sindirela Bobarić
Ko jekh purano vakti sine peske duj amala Roma. Jekh olendar sine nekobor berša phureder e javerestar em sako drom del sine konsiloa e poterneske. Vakerel leske sine kaj prekal o dživdipa siklilo but taro pire em averengere nakerde šukar bukja.
„Ko mangipa akava si tuke majšukar egzamplo, Sine man jekh drom jekh kamli , ama na sine šukare, a akana si man aver em oj si but šukar. Sine man buti , ama na but šukar, akana si amn nevi em si but pošukar akaja. Sine man šukar amal anglal tute kana havgjum kaj ov nane mangeamal em akana si man ki tute but pošukar amal. Agjaar sikljiljum but taro kamlipa, buti em amalipa”
O majterno Rom impresionirime taro džanlipa e phurederestar dikhel sine kaj sa so vakerel leske ov ov si majgogjaver em dikhel le sine sar oleskoro sikavno.
Jekh dive o phureder akhargja le te phiren ahri ki veš. Phiridor dikhlja šužđe bobinke ko jekh kašt, uklilo ko kašt, khedinngja o bobinke em haljalen korkoro.
„Sosoke mange da na khedingjan hari taro bobinke?„ pučlja o poterno amal. „ Vakergje mange kaj ko dživdipa valjani korkoro tuke te kere soske niko aver nane te kerel tuke , em te mangljan bobinke korkoro ka ukle em ka khede tuke“. Pošukar ka moldine odova so korkoro ka arakhe le , ka lele em ka kerel le“
O majterno Rom na uklilo ko kašt soske sine le dar taro učipa, em o bobinke na sine leske više interesantno hajbaske.
Phirindo em kerindo lafi o duj džene taro jekh drom ko drumo iklilo lenge jekh but baro ruv. Darandile o solduj džene. O phureder odma uklolo ko kašt te kurtalinel. O majterno nadžanlipaja kaj te garavel pe pašlilo tele keribaja kaj si mulo.
Tari dar ni na dišinel sine . O ruv alo dži ko majterno , hari nuškingja le em palo odova chidingja pe em gelo peske ko drumo majodoriga.
O poterno našti sine te pakjal so ulo leja. Kana o ruv gelo peske dur pohari uštilo em darutne počmingja te dišinel. Kana o phureder dikhlja kaj o ruv durandilo ko drumo em gelo peske hulilo taro kašt.
„So vakergja tuke o ruv kana alo paše dži ko to muj???!„ pučlja daravutne o phureder Rom.
„O Ruv alo dži ko mo kan hem vakergja mange ma te ovav amal manušencar so ka mukhen man kena isi belje“ vakergja o poterno Rom.
Link: https://romanolil.net/2019/10/15/1808/
