Ko 30 januari agorkerena 14 berša taro meripa e fundavutneske e romane čhibjake an i Makedonia o profesori Šaip Jusuf . Ov mulo ko Skopje ko 2010 berš.
O Šaip Jusuf si bijamo ko 1933 berš. Studirinel sine ko Beograd ko fakultetobaši fizičko kultura . O Šaip Jusuf sine jekh taro organizatoria e Jekhto Romane lumiakere kongreseske ko London ko 1971 berš thaj sine membro an o IRU.
O Šaip Jusuf si autori e avgo romane gramatikake an i Makedonia. Ov piro hramovipa e gramatikake agoorkjergja la ko 1973 berš, a barabutne e Krume Kepeski i gramatika ki romani čhib sine editirime ko 1980 berš ki editacia taro 3.000 kotora tari „Naša kniga“ ko Skopje. Aver literaturno kotora taro leskiri barvali historia si „Amen siam e Titoskere, o Tito si amaro“– an o 1978 berš ko srbiakoro –kroaciakiri edicia taro Drago Zdunjić. Oleskere aktenge bašo sa so kergja , avdibve ki komuna Šuto orizari legarel o anav tari I maškarutni škola.
