An i piri barvali boksersko kariera, o Redžepovski enja berša sine an i reprezentacia e teganutne Jugoslaviake thaj pandž berš šampioni an i them so dživdinen sine 20 milionia manuša.
Piro sukceso thaj resiba olimpisko, mediteransko, balkansko, nacionalno thaj but aver medalje, kerel sine pire but šiukar trenerea Bruno Hrastinski so sine treneri an i boksersko reprezentacia, thaj e bare manginake sp sine le te ovel sukcesialo bokseri trujal pire phare treningia so sine po šov saatoa ko dive anglal o bare mečia.
Mukhlo korkoro thaj bizi buti pobuter taro deš berša pire šov dženegere familiaja dživdinel sine taro socialno suporto taro 50 eura, a palo 2010 berš reslja themutni penzija beašo resle sukcesia an o sporti.
O Redžep Redžepovski is le bari mangin te ovel palem an o boksi thaj sar treneri te del suporto eb ternenge te kerel progresi. Numa sar so ov vakerela na šartia bukjake.
- Mangljum te ovav treneri , numa na arakhljum suporto. Trujal so ko BK Kumanovo isi nekobor entuziastia so čače kamen o boksi , olen na sine len takati te keren majšukar šartia bukjake thaj te iranen o klubi ko purane pozicie.
Akate trubul te del suporto o lokalno legaripa so na trubul te bisterel akj o Kumanovo sine pandžardo an i lumia prekal pire boksersko šampionia - vakerel o Redžepovski.
O Redžep Redžepovski pore sorptsko rezultatencar arakhlja than an o Klubi taro bare an o Makedonikano olimpisko komiteto. Ov tarp 2003 berp si membro akale asociaciake so sikavel o makedonikano sportsko liderstvo. Ko momenti an o Klubi e barengoro ko MOK isi 23 anava si kergje afirmacia e sporteske an i Makedonia. Maškar olende isi than e personake so lelja rupikano olimpisko medali si thaj o Redžep Redžepovski.
