I folk čeren Šaban Šaulić so mulo an o 17 fevruari an i trafikoskiri bibaht an i Germania, sine parume bizi desavi religisko ceremonia an o 22 fevruari. oleskere paše komentirinena bizi diferenca taro dizjakoro ofiso so ange decizia te ovel parume an o Beograd , i mangin taro Šaban Šaulić sine thaj sako drom vakerel sine kaj kamel te ovel parume trujal o limor tari oleskiri daj i Ilduze, so si parume aso muslimansko adetia.

Oleskoro meriba sine sig thaj naudžardo , thaj o Šaban oleskoro amaneti ni pe romanjake ni pe čhavenge na vakergja le. Ola angje decizia an o paruniba ma te akharen ni popia ni odže . Organiziringje civilno paruniba trin harmonikencar thaj i gili "Ne plači dušo"".

Numa panda na nakhle 40 divesa taro oleskoro paruniba , aso religiakere pakjaviba te šaj oleskoro ruhi te arakhel piro than , a ki familia thaj ko paše komšie isi bari panika. Ko familiarno kher e giljavutneskoro ko thavdipa e rakjake dikhena e Šabane sar phirela, ačhavel thaj tharel i elektrika, bešela ko saloni ko kalo kote so majbut bešel sine em dikhel i len Dunav.

Nesave mediumia odova komentiringje kaj "O Šaban Šaulić ulo čohano" thaj dena desave komentaria taro oleskere komšie so an i panika rodena odže thaj aver religiakere manušen sar arka.
-Savore si an o šok thaj odoleske divesencar kerel pe lafi. Niko tari paše familia e Šabaneskiri ake 10 dive na avena ko kher. Jali na troman jali roden te faislkeren o problemi odžencar jali poponcar , vakeren e beogradsko mediumenge o komšie taro Šaban Šaulić.

O adetia so keren pe an o dženaze, varirinena taro than ko than , numa okova so si dikhlo an o Sombor, šaj te okarakterizirinel pe sar jekh but interesantno.

An o FB sine editirime jekh video tari dženaza tari nesavi Kata, so kerel pe sine desave adteia ko paruniba trubačencar, gilencar , khelibaja trujal o tabuti.

O reakcie sine diferentno, thaj ko jekh o orkestari da vakergja piro dikhiba thaj komentaro akale situaciake.
„Akhargje amen thaj amen avilem ko akala Hungariakere Roma soske odova olende si adeti. Amen avilem, kergjem amari buti thaj odova sine sa."

Palo odova počmingje komentaria thaj diskusie aso akava an o FB, bizi diferenca si li odova desavo adeto jali odova manglja angleder odova manuš so mulo.

-Amen gindinaja kaj akava nane nisavi konekcia e nacionalitetea thaj nacijaja si li Rom jali Srblia, majpakjabvutne sine akaja agorutni mangin taro mulo te ovel parume muzikaja, thaj sar amaneto so sako šaj te mukhel, thaj na trubul te teleperava e manušen upral nacionalno funda, vakeren kotor taro komentaria an o FB.

Aver komentaria sine lem humor sar egzamplo: " Kana ka merav mande da agjaar te parunen man. Žurka, muzika. Salde ma bešen upral o tabuti , ma te legarel man i atmosfera pa te uštav te khelav.