O manuša so ačhile analfabetia – napismeno taro diferentno faktoria an o dživdipa, šansa te šaj te keren odova thaj te agorkeren fundavno edukacia ka ovel len thaj ko phureder berša.
Ola trubul salde te motivirinen pe te nakhaven o udar tari škola ” Anton Semjonović – Makarenko” an o Skopje. O pedagogo Armend Selmani vakerela kaj an o akava momento si len 352 sikle so džana an i akaja urgentno edukacia.
I plani an i škola e barenge si hari aver forma so si okoja e tikne čhavenge. I edukacia si an o blok saatia, i edukacia si an i makedonikani thaj albanikani čhib, isi sikle taro buteder nacionalitetia thaj an o agor resen sertifikato – sviditelstvo bašo agorkerdi edukacia.
P phureder sikle aso o pedagogo Selmani sikaven šerutne socio-ekonomikano faktori soske nane len fundavno edukacia.
O ministeri baši edukacia Pištar Ljutfiu vakerel kote an i Makedonia isi 14 fundavno škole phurederenge kote an o berš hramosarena pe po 300 džene.
„Dikhibaja o faktori anglutne beršengoro soske na gele an i edukacia, akana i situacia šaj te ovel majlačhe. Barabutne isi 14 asavke škole so šerutne si fokusirime an i šerutni diz , thaj isi an o aver da dizja” vakerel o ministeri Ljutfiu.
Ov vakerela kaj o koncepti akale školenge si kerdo aso internacionalno džanlipa implementirime prekal i organizacia UNDP.
I programa akana konektirinela 6 konceptia maškar so sikljoviba internacionalno čhib, socialno, digitalno thaj aver džanlipa.
Sa akava udžarel pe te del pe šajdipa o kandidatia te resen džanlipaja thaj pativ te šaj džan an i berza bukjake. Aso themakoro Ofiso baši Statistika an i Makedonia nane tiknjardo o numero e analfabeti manušenge, kote aso o agorutni statistikani operacia o numero e manušenge an o 2002 berš legarela 63,500 dizutne jali 3.6% taro sa o dizutne.
