E komunakoro deputato an o Kosnili an i komuna Kumanovo , Ašmet osmanovski tari koalicia “Baši pošukar makedonia” , došperavela e JP” Higiena thaj parkia” bikinel limoriengere thana an i parcela so si privat.
Ov zojrakerela kaj o katastarsko parcela telal o numero 3407, kote angleder 20 berša kingela la taro Religiakoro ofiso e Romengoro an o Kumanovo, bašo muslimansko romane limoria, akana legarela la o JP bizo te den lan dekreto.
„Angleder jekh berš rodingjem taro JP te vakerel soske kergje uzurpacia akale privat thaneske , numa na reslem dži ko antvorto. Sar šaj jekh asavki firma te kerel buti an o privat than thaj te lel love? Dži kana o direktori ka phagel o kanonia thaj nadžovaplime ka kerel buti an o ziani e gazdaske taro akava than a odova si e Religiakoro ofiso e Romenge? Soske e dizjakoro šerutno so džanel akava problemi lungo periodo ignoririnel thaj na kerel khanči te šaj čhinavel akava kriminali taro JP„, – pučel o deputato an o Konsilo e komunake o Osmanovski an i pres konferencia.
O Osmanovski e phuvjake si le latastarsko lista thaj rodingja an i bešin e Konsileske te dikhel pe akava problemi numa o propozalo na sine akcpetirime.
O Direktori akale JP “Higiena thaj parko” vakerel kote trujal o muslimansko limoria isi pobuter nive so kotor olendar si kinde tari i komuna thaj i firma thaj vakerel kaj ka keren kontrola kaskiri si odoja problematično parcela.
„Akala došpervaina si tendeciozno, soske dži akana ni jekh hramosarde lilea na dengja dži ki firma te faisalkerel pe akava problemi. Amen mangaja te dikha i faktičko situaci, soske kerel pe buti baši Parcela taro Ofiso e Romengoro kote so kerel buti akaja firma , thaj trubul Decizia jali faisali te del pe amenge. Sebepi so i phuv odole aktiviteteske , aso o Kanoni bašo limoria, ni jekh na tromal te kerel odoja buti thaj te randel limori. Amende nane amen kanonikani savala te kera neko ma te pukjinel taksa – tarifa , vakergja o direktori e JP “Higiena thaj parko” Sašo Petruševski.
Ov akharel e membron taro Ofiso e Romengoro te aven an i firma thaj te arakhen faisali e problemeske , soske kotor taro Roma rodena te oven parume an i odoja parcela.
